सबजेलमधील कैद्यांचा पत्र लेखन स्पर्धेत सहभाग

म. टा. प्रतिनिधी, नगर
‘आदरणीय बापूजी... साष्टांग दंडवत...’ अशी सुरुवात करून राष्ट्रपित्याविषयी असणारी कृतज्ञता येथील उप कारागृहातील (सबजेल) कैद्यांनी पत्रातुन व्यक्त केली आहे. यासाठी निमित्त ठरले ते पोस्ट विभागाने आयोजित केलेल्या पत्रलेखन स्पर्धेचे. या स्पर्धेला सबजेलमधील कैद्यांनी भरभरून प्रतिसाद दिला.
राष्ट्रपिता महात्मा गांधीच्या जयंतीनिमित्त भारतीय डाक विभागामार्फत नुकतीच पत्रलेखन स्पर्धा घेण्यात आली. या अखिल भारतीय पत्रलेखन स्पर्धेत नगर उपकारागृहातील १५ कैद्यांनीही सहभाग घेतला. त्यांनी लिहिलेली पत्रे शुक्रवारी कारागृह अधीक्षक नागनाथ सावंत यांनी वरिष्ठ पोस्टमास्टर अंबादास टेकाळे यांच्या सुपूर्द केली. या वेळी वरिष्ठ तुरुंग अधिकारी शामकांत शेडगे, डाक विभागाचे विपणन अधिकारी नितीन चौधरी व अन्य उपस्थित होते.
मनातील भावना व्यक्त करणारी पत्रे लिहून सबजेलमधील कैद्यांनी अहिंसेचे पुजारी महात्मा गांधी यांच्याप्रती कृतज्ञता व्यक्त केली आहे. ‘प्रिय बापू’ या संबोधनाने सुरुवात करीत कारागृहातील या बंदीजनांनी स्वहस्ताक्षराहात ही पत्रे लिहिली आहेत. भारतीय डाक विभागाद्वारे राष्ट्रपिता महात्मा गांधी यांच्या जयंतीनिमित्त पत्रलेखन स्पर्धा आयोजित करण्यात आली आहे. राष्ट्रपिता बापूंच्या नावे पत्रलेखन करण्याची संधी शालेय तसेच महाविद्यालयातील विद्यार्थ्यांसहित सर्वांसाठी खुली आहे. या स्पर्धेत पत्रलेखन करण्याची कल्पना कारागृह अधीक्षक सावंत यांनी बंदीजनांना सांगितली. बंदीजनांनीही मग महात्मा गांधींच्या नावे पत्र लिहिण्यासाठी उत्साह दाखवल्यावर पोस्ट कार्यालयाकडून पत्रलेखन साहित्य व लिफाफे (पाकिटे) कारागृह प्रशासनास देण्यात आली. या स्पर्धेत भाग घेताना माहितीचे सहाय मिळावे, कैद्यांना महात्मा गांधीजींच्या जीवनातील विविध घटनांविषयीच्या संदर्भांची माहिती मिळावी म्हणून तसेच स्पर्धेची पूर्वतयारी म्हणून कारागृह प्रशासनाने महात्मा गांधीजींच्या जीवनावरील पुस्तके कैद्यांना वाचण्यासाठी उपलब्ध
करून दिली होती. काही दिवस गांधीजींचे जीवनचरित्र, अहिसेंचे पाठ वाचल्यानंतर कैद्यांनी पत्रलेखन केले. बहुतेक कैद्यांनी आपल्या पत्राची सुरुवात ‘प्रिय बापूजी’, ‘आदरणीय बापूस’, ‘प्रिय बापू’, ‘महात्मा मोहनदास करमचंद गांधी तथा प्रिय बापूजी’, ‘आदरणीय बापू... साष्टांग दंडवत’, अशी केल्याचे दिसून आले. कैद्यांनी लिहिलेली ही पत्रे पोस्टाच्या वरिष्ठ कार्यालयास विशेष टपालाने पाठविण्यात येणार आहेत.