जन्माष्टमीनिमित्त मिरवणूक

म. टा. प्रतिनिधी, नगर
ढोल-ताशांच्या गजरात श्रीकृष्णाची निघालेली पालखी... श्रीकृष्ण-राधा यांचा आकर्षक देखावा.... विविध भजने सादर करणारे पथक... श्रीकृष्ण व राधा यांची वेशभूषा करून सहभागी झालेले बालके... अशा उत्साहाच्या वातावरणात भगवान श्रीकृष्ण जन्माष्टमीनिमित्त सोमवारी शहरातून मिरवणूक काढण्यात आली.
सर्जेपुरा येथील राधाकृष्ण मंदिरात श्रीकृष्ण जन्माष्टमीनिमित्त विविध धार्मिक कार्यक्रमांचे आयोजन करण्यात आले आहे. सोमवारी या मंदिरापासून पारंपारिक वाद्यांच्या गजरात भगवान श्रीकृष्णाची मिरवणूक काढण्यात आली. फुलांनी सजवलेल्या मुख्य रथामध्ये भगवान श्रीकृष्णाची मूर्ती, सहभागी झालेले ढोलपथक हे मिरवणुकीचे आकर्षण ठरले. भक्तीगीत व पारंपारिक वाद्यावर उपस्थित भाविकांनी ठेका धरला. सर्जेपुरा मंदिरापासून सुरू झालेली मिरवणूक तेलीखुंट, एम.जी.रोड, अर्बन बँक रोड, नवी पेठ, नेता सुभाष चौक, तेलीखुंटमार्गे पुन्हा मंदिराजवळ आली. मिरवणुकीचे गुलशनकुमार धुप्पड, गंगाभिषण चड्डा, हितेश ओबेरॉय, राकेश गुप्ता, प्रदीप पंजाबी, अजय पंजाबी, गुलशन कंत्रोड, राजेंद्र कंत्रोड, किशोर कंत्रोड यांच्यासह भाविक सहभागी झाले होते. दरम्यान श्रीकृष्ण जन्मोत्सवनिमित्त मंदिरात विविध धार्मिक कार्यक्रमांचे आयोजन करण्यात आले आहे. मंगळवारी मंदिरामध्ये सकाळी अकरा वाजता भजनाचा कार्यक्रम होणार आहे. त्यानंतर दहीहंडी फोडण्यात येणार असून भाविकांनी याचा लाभ घ्यावा, असे आवाहन करण्यात आले आहे.