प्रोफेसर कॉलनीचा रस्ता खड्ड्यात

म. टा. प्रतिनिधी, नगर
सावेडी उपनगरातील प्रोफेसर कॉलनी चौक-प्रेमदान चौक रस्त्याची दुरावस्था झाली आहे. रस्त्यावर ठिकठिकाणी खड्डे पडले असून त्यामुळे येथून प्रवास करणेही वाहन चालकांसाठी धोकादायक ठरत आहे. रस्त्यावर अतिक्रमणाची समस्याही गंभीर झाली असून आता हा रस्ता सर्वात धोकादायक बनू लागला आहे.
सावेडीतील सर्वात महत्त्वाचा म्हणून प्रेमदान चौक-प्रोफेसर कॉलनी चौक हा रस्ता ओळखला जातो. उपनगरातून मध्यवर्ती शहरात जाण्यासाठी भिस्तबाग चौक-प्रोफेसर चौक-प्रेमदान चौक हा रस्ता सोयिस्कर असल्यामुळे उपनगरातील सर्वात जास्त वर्दळीचा हा रस्ता आहे. तसेच दररोज सकाळी व सायंकाळी प्रोफेसर चौकात तर विविध खाद्यपदार्थ्यांच्या गाड्या लागलेल्या असतात. याठिकाणी खाद्य पदार्थ्यांचा आस्वाद घेण्यासाठी उपनगरासह मध्यवर्ती शहरातूनही नागरिक येतात. परंतु सर्वात वर्दळीच्या असणाऱ्या या रस्त्याकडे मनपाचे दुर्लक्ष झाले आहे.
रस्त्यावर ठिकठिकाणी खड्डे पडले असून पावसाचे पाणी त्यात साचत आहे. त्यामुळे पाऊस पडल्यानंतर येथून प्रवास करताना वाहनचालकांना कसरत करावी लागत आहे. बऱ्याचवेळा खड्ड्यांचा अंदाज न आल्याने या रस्त्यावर छोटछोटे अपघात होत आहेत. विशेष म्हणजे या रस्त्याच्या कडेला इमारतीच्या बांधकामासाठी आणण्यात आलेली वाळू टाकण्यात आली आहे. या वाळुमुळेही गाडी घसरून अपघात होण्याचे प्रमाण वाढले आहे.

पथदिवे राहिले नावालाच

प्रेमदान चौक ते प्रोफेसर कॉलनी चौक रस्त्याच्या दोन्ही बाजूने नव्याने पथदिव्यांसाठी लाल खांब उभारण्यात आले आहे. त्यावर दिवे बसवण्याचे कामही पूर्ण झाले असले तरी रात्रीच्या वेळी यामधील अनेक पथदिवे हे बंदच असतात. त्यामुळे रात्रीच्या वेळी खराब रस्त्याचा अंदाज येत नसून त्याचा फटका हा वाहनचालकांना बसत आहे.