सरकारच्या प्रतीकात्मक पुतळ्याची अंत्ययात्रा

म. टा. प्रतिनिधी, नगर

मागील एक महिन्यात पेट्रोलच्या किमती राज्य सरकारच्या धोरणामुळे सातत्याने वाढत असल्यामुळे राष्ट्रवादी युवक काँग्रेसच्या वतीने त्याचा निषेध करण्यात आला. संघटनेच्या कार्यकर्त्यांनी सरकारच्या प्रतीकात्मक पुतळ्याची अंत्ययात्रा काढून पुतळ्याला चपलेचा हार घातला.

पेट्रोलच्या किमतीवर राज्य सरकारने अधिभार लावल्यामुळे पेट्रोलची किंमत दोन रुपयांनी वाढली आहे. विशेष म्हणजे मागील महिन्यातही सरकारने अधिभार लावल्यामुळे पेट्रोलची किंमत वाढली होती. त्यामुळे राष्ट्रवादी युवक काँग्रेसच्या कार्यकर्त्यांनी गुरुवारी आक्रमक होऊन नगर शहरामध्ये आंदोलन करीत भाजप सरकारचा निषेध केला. स्वस्तिक चौक येथून सरकारच्या प्रतीकात्मक पुतळ्याच्या अंत्ययात्रेला सुरुवात झाली. अंत्ययात्रा छत्रपती शिवाजी महाराज चौकात आल्यानंतर तेथे पुतळ्याला चपलेचा हार घालण्यात आला. राष्ट्रवादी युवक काँग्रेसचे अध्यक्ष अभिजित खोसे, विजय वाघ, सागर गुंजाळ, राहुल ठोंबरे, शाम नाईक, राहुल भागवत आदी उपस्थित होते.