स्वातंत्र्यदिनानिमित्त जनजागृती उपक्रम
संगमनेर/अकोले : देशभर स्वातंत्र्यदिन (१५ ऑगस्ट) बुधवारी उत्साहात साजरा झाला. जिल्ह्यातील ग्रामीण भागातही अनोख्या पद्धतीनं जनजागृती करीत स्वातंत्र्यदिन साजरा करण्यात आला. संगमनेर तालुक्यातील वडगावपान येथील डी. के. मोरे जनता विद्यालयात कांडेकर व कसाब सर यांच्या संकल्पनेतून मुख्यमंत्री मदत वाहिनी असलेल्या १८१ क्रमांकात बैठक व्यवस्था करून ध्वजवंदन करण्यात आले. अनेक वेळा ग्रामीण भागात वैद्यकीय सेवेची अडचण येते, अशावेळी अशाप्रकारे जनजागृती करून मोरे विद्यालयात स्वातंत्र्यदिन साजरा करण्यात आला. प्रतापराव मोरे यांच्या हस्ते या वेळी ध्वजवंदन करण्यात आले. शाळेतील सुमारे १ हजार ७०० विद्यार्थ्यांची १८१ या अंकाच्या रचनेतील बैठक व्यवस्था आकर्षक दिसत होती. या वेळी ड्रोन कॅमेऱ्याच्या मदतीने हे दृश्य टिपण्यात आले.
विकासकामांचे उद्घाटन
स्वातंत्र्यदिनानिमित्त (१५ ऑगस्ट) डोळासणे येथील काळभैरवनाथ विद्यालयात आमदार बाळासाहेब थोरात यांच्या हस्ते ध्वजवंदन करण्यात आले. या वेळी पठार भागातील विविध विकासकामांचे उद्घाटन करण्यात आले. कर्जुले पठार येथे पशुवैद्यकीय दवाखान्याचे भुमिपूजन, वरवंडी येथे पशुवैद्यकीय दवाखान्याचे भुमिपूजन, सभामंडप भुमिपूजन व उद्घाटन, बंधारा पुनर्भरण कामाची पाहणी, खांबे येथे स्ट्रीटलाइट व पेव्हिंगब्लॉक लोकार्पण सोहळा, खांबे ते खरशिंदे रस्ता भुमिपूजन तसेच खरशिंदे येथे ग्रामपंचायत इमारत व पाण्याच्या टाकीचे भुमिपूजन कार्यक्रम करण्यात आले. आमदार डॉ. सुधीर तांबे, बाजीराव खेमनर, जिल्हा परिषद कृषी, पशु संवर्धन सभापती अजय फटांगरे, सभापती नीशा कोकणे, सभापती शंकर खेमनर, मीरा शेटे, इंद्रजीत खेमनर, प्रियांका गडगे, संगीता कुदनर, किरण मिंडे आदी या वेळी उपस्थित होते.
अमृतवाहिनी शेती व शिक्षण विकास संस्थेतही स्वातंत्र्यदिनाचे ध्वजवंदन करण्यात आले. प्रसिद्ध उद्योजक राजेश मालपाणी, संस्थेच्या विश्वस्त शरयु देशमुख, मुख्य कार्यकारी अधिकारी अनिल शिंदे, व्यवस्थापक प्रा. व्ही. बी. धुमाळ, प्राचार्य डॉ. एम. ए. व्यंकटेश, उपप्राचार्य अशोक मिश्रा, डॉ. बाबासाहेब लोंढे, डॉ. चव्हाण, प्रा. मनोज शिरभाते, एस. टी. देशमुख, जे. बी. शेट्टी, प्रा. बाळासाहेब शिंदे, प्रा. सुनील सांगळे, प्रा. शीतल गायकवाड, जी. बी. काळे, नामदेव गायकवाड, शोभा हजारे, सुदर्शन डंग, प्रा. विजय वाघे, आदिनाथ काळे आदी उपस्थित होते. नामदेव कहांडळ यांनी सूत्रसंचालन केले. प्रा. बाळासाहेब शिंदे यांनी आभार मानले.
अकोल्यात विद्यार्थ्यांना खाऊवाटप
अकोले येथील श्री स्वामी समर्थ सेवा संस्था संचलित श्री स्वामी समर्थ माध्यमिक व उच्च माध्यमिक विद्यालयात भारताच्या ७२ व्या स्वातंत्र्यदिनानिमित्त अॅड. अनिल आरोटे यांच्या हस्ते ध्वजवंदन करण्यात आले. विजय पोखरकर, सिने कलाकार बाळासाहेब घोडके या वेळी प्रमुख पाहुणे होते. कोषाध्यक्ष हबीब मणियार, देवीदासजी शेलार, महंमद मणियार, पुष्पा लहामगे, पालक व ग्रामस्थ मोठ्या संख्येने उपस्थित होते. प्रा. मंजूषा काळे यांनी आभार मानले. ध्वजवंदनानंतर विद्यार्थ्यांना खाऊचे वाटप करण्यात आले.
राहुरीत युवकांची मशाल फेरी
राहुरी : राहुरी शहरासह तालुक्यात स्वातंत्रयदिन उत्साहात साजरा करण्यात आला. तहसील कार्यालयाच्या आवारात मुख्य शासकीय ध्वजवंदन कार्यक्रम झाला. तहसीलदार अनिल दौंडे यांच्या हस्ते ध्वजवंदन झाले. पोलिस निरीक्षक अविनाश शिळीमकर व पोलिसांनी मानवंदना दिली. महात्मा फुले कृषी विद्यापीठात कुलगुरु डॉ. के. पी. विश्वनाथा यांच्या हस्ते झेंडावंदन झाले. विविध शाळा, कॉलेज, सेवा संस्था, बाजार समिती, ग्रामपंचायती या ठिकाणी उत्साहात झेंडावंदन झाले. बहुतांश ठिकाणी देशभक्तीपर गिते सादर करण्यात आली. स्वातंत्रयदिनाच्या पूर्वसंध्येला युवकांनी मशाल फेरी काढली. अखंड भारत संकल्पदिनानिमित्त राष्ट्रभक्तीपर गीतांच्या तालावर शहरात विविध भागात फेरी काढण्यात आली होती. यात युवकांचा मोठा सहभाग होता.