नगर : करारापोटी भाडेतत्त्वावर दिलेल्या जागेवरून भाडेकरूला जबरदस्तीने हटविणाऱ्या जागा मालकाच्या संबंधित सहा जणांना एक वर्षाची सक्तमजुरी व ७७ हजार रुपयांचा दंड अशी शिक्षा सुनावण्यात आली आहे. दंडातील ७० हजार रुपयांची रक्कम भाडेकरूला देण्याचा आदेश न्यायालयाने दिला आहे. जिल्हा न्यायाधीश एच. एस. सातभाई यांच्या न्यायालयाने हा निकाला दिला.
शहरातील निसार इस्माइल तांबोळी यांनी बेपारी मोहल्ला येथील खुदाबक्ष इमाम सय्यद यांच्याकडे ११ वर्षांच्या करारापोटी भाडेतत्त्वावर जागा घेतली होती. त्या जागेवर तांबोळी यांनी रेहेनुमा ऑटो वर्क नावाचे दुकान सुरू केले होते. २० सप्टेंबर २०१६ मध्ये तांबोळी हे दुकान उघडण्यासाठी गेले असता. त्यांच्या दुकानाची तोडफोड करून साहित्य रस्त्यावर फेकून दिले होते. याप्रकरणी जागा मालक खुदाबक्ष इमाम सय्यद, इर्शाद सय्यद, रफीक खुदाबक्ष सय्यद, फैय्याज खुदाबक्ष सय्यद, अरबाज फय्याज सय्यद, अल्तमश फैय्याज सय्यद, शकील हबीब सय्यद, मुर्तुजा ऊर्फ राजू खुदाबक्ष सय्यद (रा. बेपारी मोहल्ला, सुभेदार गल्ली) यांच्याविरुद्ध कोतवाली पोलिस स्टेशनला गुन्हा नोंदविण्यात आला होता. पोलिस उपनिरीक्षक एम. बी. सय्यद यांनी तपास करून आरोपीविरुद्ध दोषारोपपत्र दाखल केले होते. खटला प्रलंबित असताना आरोपी शकील सय्यद यांचा निधन झाले होते. त्यामुळे उर्वरित सात आरोपींविरुद्ध खटल्याची सुनावणी जिल्हा न्यायाधीश सातभाई यांच्यासमोर झाली. सरकार पक्षाच्या वतीने अतिरिक्त सरकारी अभियोक्ता व्ही. के. भोर्डे यांनी चार साक्षीदारांची साक्ष नोंदविली होती. न्यायालयाने सरकार पक्षाचा युक्तिवाद ग्राह्य धरून आरोपींना दोषी ठरविले. परंतु, खुदाबक्ष सय्यद हे वयस्कर असल्याने त्यांना न्यायालय उठेपर्यंत शिक्षा व अकरा हजार रुपये दंड केला. तर इतर सहा आरोपींना एक वर्षांचा कारावास व प्रत्येकी अकरा हजार रुपयांचा दंड ठोठावला.