'झेडपी'च्या स्थायी समितीचे आदेश
म. टा. प्रतिनिधी, नगर
जिल्हा परिषदेच्या आरोग्य विभागांतर्गत जिल्ह्यात ठिकठिकाणी सुरू असलेली बांधकामे वेळेत पूर्ण करण्याच्या सूचना बांधकाम विभागास देण्यात आल्या आहेत. याबरोबरच बांधकामे वेळेत पूर्ण न करणाऱ्या ठेकेदारांवर कारवाई करुन त्यांना काळ्या यादीत टाकावे, असे आदेशच मंगळवारी झालेल्या आरोग्य समिती सभेत देण्यात आल्या आहेत.
जिल्ह्यात ठिकठिकाणी आरोग्य केंद्रांची बांधकामे सुरू आहेत. या बांधकामांचा आरोग्य विभागाकडून आढावा घेण्यात आला. कामे वेळेत पूर्ण करण्याच्या सूचना देण्यात येतात. परंतु, बांधकाम विभागाकडून मात्र विलंब होत असल्याच्या तक्रारी या आधीही सदस्यांनी केल्या आहेत. या सभेत जिल्ह्यातील बांधकामांचा आढावा घेण्यात आला. बांधकामे वेळेत पूर्ण करण्याच्या सूचना देण्यात आल्या. यानंतरही ठेकेदारांनी मुदतीत बांधकामे पूर्ण केली नाहीत, तर त्यांच्यावर कारवाई करुन त्यांना काळ्या यादीत टाकण्याचे आदेश या सभेत देण्यात आले. जिल्ह्यात पावसाळ्यास सुरुवात झाली आहे. आरोग्य केंद्रांचे वैद्यकीय अधिकारी आणि कर्मचारी यांनी मुख्यालयात हजर रहावे, पाणी शुद्धीकरणासाठी वापरण्यात येणारी टीसीएल पावडर ग्रामपंचायतींकडे आहे का? याबाबत खात्री करण्याच्या सूचना अधिकाऱ्यांना देण्यात आल्या आहेत. आषाढी वारीनिमित्त पंढरपूरकडे दिंड्या जात आहेत. या दिंड्यांना आरोग्य सुविधा पुरवण्याच्याही सूचना सभेत देण्यात आल्या. या वेळी समिती सदस्य उपस्थित होते.