दूध संकलन केंद्रांवर छापे

म.टा.प्रतिनिधी,नगर
नेवासा तालुक्यात तीन दूध संकलन केंद्रावर स्थानिक गुन्हे शाखेच्या पथकाने बुधवारी छापा टाकून दहा गोण्या पावडर, रसायन असे साहित्य पकडले आहे. या दूध संकलन केंद्रावर भेसळ होत असल्याचा संशय असून, बारा हजार लिटर दूध नष्ट करण्यात आले आहे. उशीरापर्यंत अन्न प्रशासनाची कारवाई सुरू होती.

नेवाशात श्री भवानी मिल्क प्रोसिंग व झापवाडी येथे दूधसंकलन केंद्रावर दूधात भेसळ केली जात असल्याची माहिती स्थानिक गुन्हे शाखेचे पोलिस निरीक्षक दिलीप पवार यांना मिळाली होती. त्यानुसार स्थानिक गुन्हे शाखेच्या पथकाने नेवासा तालुक्यातील साईनानगर येथील श्री भवानी दूध प्रोसेसिंग या दूध संकलन केंद्रावर छापा टाकला. या ठिकाणी प्रथम येथील चार कामगारांची चौकशी करण्यात आली. दहा गोण्या पावडर आणि विविध प्रकारची रसायने आढळल्याने गुन्हे विभागाने नगर येथील अन्न सुरक्षा विभागाला माहिती दिली. पोलिसांची कारवाई सकाळी झाल्यानंतर अन्न प्रशासनाचे सुरक्षा अधिकारी राजेंद्र पवार व भारत पवार यांच्यासह पथक दुपारनंतर घटनास्थळी गेले होते. डेअरीतील अडगळीच्या खोल्यामध्ये संशयित बनावट दूध बनवणारी साहित्य जप्त करून प्रत्येक वस्तूचे नमुने घेण्यात आले आहे. डेअरीसमोर उभा असलेला नऊ हजार लिटर दूध असलेला टँकरमधील दुधाचे नमुने घेण्यात आल्यानंतर टँकरमधील नऊ हजार लिटर दूध नष्ट करण्यात आले. या ठिकाणी ११ बॅग रासायनिक पावडर, कॉस्टिम सोडा व पोटॅश पावडर असे साहित्य जप्त करण्यात आले आहे. हे साहित्य बनावट दूध तयार करण्यासाठी वापरण्यात येत असल्याचा संशय आहे. नमुने तपासणीसाठी प्रयोगशाळेत पाठविण्यात येणार आहे. त्याचा अहवाल आल्यानंतर खरी माहितीसमोर येईल, अशी माहिती अन्न सुरक्षा अधिकारी राजेंद्र पवार यांनी दिली.

तर खुपटी, झापवाडी येथे पोलिसांनी छापे टाकले. झापवाडी येथील दूध संकलन केंद्रावर तीन हजार लिटर दूध आढळून आले. या केंद्रावर पावडर व रसायन आढळून आले आहे. एकाच केंद्रावर अन्न प्रशासनाचे अधिकारी कारवाई करत होते. त्यामुळे या दोन केंद्रावर अन्न प्रशासनाचे अधिकारी हे उशीरापर्यंत गेले नव्हते.