म. टा. प्रतिनिधी, नगर
नगर रेल्वे स्थानकातील प्लॅटफॉर्मच्या पत्र्यांचे दुरुस्तीचे काम करत असताना रेल्वेचे विजेच्या अतिउच्चदाबाच्या वाहिनीमधून वीजप्रवाह उतरून दोन कर्मचारी भाजले आहेत. शुक्रवारी दुपारी साडेतीनच्या सुमारास ही घटना घडली.
रमेश देवराम साळवे (वय ५९) व रवींद्र बळीराम ताकतोडे (वय ४५) अशी जखमी झालेल्या कर्मचाऱ्यांची नावे असून, त्यांना उपचारासासाठी सिव्हिल हॉस्पिटलला दाखल करण्यात आले असल्याची माहिती नगर रेल्वे पोलिस स्टेशनचे सहायक पोलिस उपनिरीक्षक एस. डी. दिवटे यांनी दिली. नगरच्य़ा रेल्वे स्थानकावरील प्लॅटफार्मवरील पत्रे पावसाने गळतात. हे पत्र गळू नयेत, म्हणून दोन कर्मचारी पत्र्यांच्या हॉलमध्ये डांबर भरत होते. त्याच वेळी रेल्वे चालविण्यासाठी असलेल्या अतिउच्चदाबाच्या वाहिनीमधून वीजप्रवाह उतरला. त्यामुळे वाहिनीने पेट घेतला. या वाहिनीखाली काम करत असलेले दोन्ही कर्मचारी यात भाजले. हे कर्मचारी अतिउच्चदाबाच्या वाहिनीखाली काम करताना रेल्वे प्रशासनाने वीजप्रवाह बंद करण्याची खबरदारी घेतलेली नव्हती. त्याचवेळी प्लॅटफॉर्मवर प्रवासी उभे होते. नगर-दौंड रेल्वे लाइनवरील रेल्वे गाड्या इलेक्ट्रिक झाल्यानंतर अशी घटना पहिल्यांदाच घडली आहे.