म. टा. प्रतिनिधी, नगर
चार दिवसांपूर्वी शहरात वादळी पाऊस झाल्यानंतर गुरुवारी सायंकाळी नगर शहर परिसरात मान्सूनपूर्व पाऊस जोरदार कोसळला. तासभर पाऊस झाल्याने शहरातील रस्त्यांवरून पाणी वाहिले. तर काही ठिकाणी महानगरपालिकेच्या गटारीमधून पाणी रस्त्यावर आले होते. त्यातून वाहन चालवताना वाहनचालकांचे मात्र हाल झाले.
सोमवारी नगर शहरामध्ये वादळी वाऱ्यांसह पाऊस झाल्याने झाडे, घरांचे पत्रे, प्लेक्स पडून नुकसान झाले होते. त्यानंतर गुरुवारी सायंकाळी साडेपाचच्या सुमारास ढग भरून येऊन जोरदार पावसाला सुरुवात झाली. पावसासह वाराही वाहत होता. वाऱ्याचा जोर कमी असल्याने शहरात झाडे पडण्याचे व इतर नुकसान झाले नसल्याची माहिती अग्रिशमन दलाकडून मिळाली. सुमारे एक तास जोरदार पाऊस झाल्याने शहरात पाणी-पाणी झाले होते. शहरातील काही भागांतून गुडघाभर पाण्यातून नागरिकांना कसरक करत चालावे लागत होते. चितळे रोड, दिल्ली गेट परिसरात रस्त्यावर पाणी साचले होते. या पाण्यतून जाताना अनेक दुचाकी बंद पडल्याने नागरिकांची हाल झाले. गेल्या पावसात रस्त्यावर पडलेल्या खड्ड्यांमध्ये पाणी साचल्याने वाहनचालकांना त्यातून मार्ग काढावा लागत होता. केडगाव उपनगरातही सायंकाळी जोरदार पाऊस बरसला. तर नगर तालुक्यांतील काही गावांमध्ये काही वेळ पाऊस झाला. परंतु, पावसाचा जोर कमी होता.
डीएसपी चौकात तळे
नगर-औरंगाबाद महामार्गावरील डीएसपी चौक येथे गटारांमधून वाहत आलेले पाणी साचले. या चौकात रस्त्यावर फूटभर पाणी साचले. या पाण्यामधून वाहनचालक वाहने चालवत होते. त्यामुळे या चौकांमध्ये काही वाहतूक ठप्प झाली होती. वाहतूक कोंडी झाल्याने एक अॅम्बुलन्स अडकून पडली. त्या ठिकाणी असलेल्या वाहतूक पोलिसांनी इतर वाहनांना बाजूला करून या अॅम्बुलन्सला रस्ता दिला. पाऊस थांबल्यानंतर वाहतूक सुरुळीत झाली.
प्रेमदान चौकामध्ये पाणीच
नगर-मनमाड महामार्गावर प्रेमदान चौकाजवळही गटारांमधून पाणी बाहेर आल्यानंतर रस्त्यावर गुडघाभर पाणी साचले होते. त्यामुळे वाहतूक खोळंबली होती. या ठिकाणाहून वाहने जाताना अनेक वाहने बंद पडली.
रेल्वे स्टेशन परिसरात काही घरांमध्ये पाणी
रेल्वे स्टेशन परिसरातील आनंदनगर येथील काही घरांमध्ये पावसाचे पाणी शिरले. ही माहिती मिळाल्यानंतर अग्निशमक दलाचे काही कर्मचारी घटनास्थळी गेले. त्या ठिकाणी उशिरापर्यंत पाणी काढण्याचे काम सुरू होते.