मूळ केरळवासीयांच्या वतीने कार्यक्रमांचे आयोजन
म. टा. प्रतिनिधी, नगर
केरळचे मूळ रहिवासी असलेल्या पण नोकरी-व्यवसायानिमित्त नगरमध्ये स्थायिक झालेल्या केरळवासियांनी येथे केरळच्या पारंपरिक ओणम सणानिमित्त येथे गाणी व नृत्योत्सव साजरा केला. यानिमित्ताने महिलांसाठी रांगोळीसह विविध स्पर्धाही झाल्या.
केरळमधील अनेकजण उद्योग-व्यवसायासाठी बाहेर पडले व जगभरात स्थायिक झाले आहेत. ते विविध धर्माचे असले तरी ओणम उत्सव एकत्र येऊन साजरा करतात व परंपरा पाळतात. यापैकी अनेक मंडळी नगरला स्थायिक झाली असून, नगरच्या संस्कृतीशी एकरूप झाली आहेत. य़ापैकी बहुतेकांना मराठी बोलता येते व येथील स्थानिक पातळीवरील सर्व उत्सवांत त्यांचा सक्रिय सहभाग असतो. शहर विकासातही त्यांचे योगदान आहे. या मंडळींकडून दरवर्षी ओणम उत्सव नगरमध्ये साजरा केला जातो. यंदाचा हा उत्सव केरला समाजच्या वतीने येथील संजोग लॉन्समध्ये झाला. उद्योजक के. के. शेट्टी यांच्या हस्ते उद्घाटन झाले. या वेळी श्रीराम येंडे, अध्यक्ष बाबुशेठ टायरवाले, ए. एस. कुरियन, वसंतसिंग, के. सुदर्शन, सुरेशकुमार, राजू लक्ष्मण, सुदर्शन मेनन, के. नंबोदरी, सुरेश पिल्लाई, स्मिता बिजू, सजी भट, स्मिता राजन आदींसह सहकुटुंब दाक्षिणात्य मंडळी उपस्थित होती. दिवसभर हा उत्सव सुरू होता. यामध्ये चित्रकला स्पर्धा, महिलांसाठी फुलाच्या रांगोळ्या स्पर्धा तसेच नृत्य, ऑर्केस्ट्रासारखे सांस्कृतिक कार्यक्रम रंगले. नगरमध्ये राहणाऱ्या विविध राज्यातील नागरिकांनी एकत्र येऊन सुरू केलेल्या भारत भारती संस्थेच्यावतीनेही या उत्सवात सहभाग घेतला गेला. यावेळी राजू लक्ष्मण, चेतन जग्गी, विश्वनाथ पोंदे उपस्थित होते.