रांगोळीला ‘आयएसओ’ मानांकन

म. टा. प्रतिनिधी, नगर
विविध मूर्ती, पुतळे, खेळणी, चित्रे, वाद्ये आदींसह अन्य अनुषंगिक साहित्याने सजवल्या जात असलेल्या रांगोळी प्रकाराला सेवा गटात ‘आयएसओ ९००१-२०१५’ मानांकन मिळाले आहे. येथील शिक्षक डॉ. अमोल बागुल यांच्या कलाविष्काराचा गौरव यानिमित्ताने झाला आहे.
कला, क्रीडा, साहित्य, चित्र, रांगोळी, निबंध, वक्तृत्व आदींसह अन्य विविध स्पर्धांतून दोन हजारावर पारितोषिके मिळविणाऱ्या डॉ. बागुल यांनी स्वतःचे स्वतंत्र रांगोळी रेखाटन तयार केले आहे. रांगोळी तसेच खेळाची मैदाने आखण्यासाठी वापरल्या जात असलेल्या पांढऱ्या फक्कीचा उपयोग करून ७९२ विविध डिझाइन्सच्या नक्षी छाप्याद्वारे ते रांगोळी रेखाटतात. यावर विविध मूर्ती, चित्रे, पुस्तके, वर्तमान पत्रे, एलइडी डिस्प्ले, निसर्गातील वस्तू, छायाचित्रे, वाद्ये, शैक्षणिक साहित्य, पुतळे, टेपरेकॉर्डर, खेळणींची मांडणी केली जाते. कलात्मक साहित्याद्वारे सजीव केल्या जात असलेल्या या रांगोळीद्वारे स्वच्छता, मतदान, प्रदूषण, आरोग्य, शिक्षण, मुली वाचवा आदी सामाजिक संदेश दिले जातात. या रांगोळी प्रकाराला त्यांनी ‘असुबा पॅटर्न’ असे नाव दिले असून, त्याला सेवा गटात ‘आयएसओ’ मानांकन मिळाले आहे.