बलात्कारित मुलीचा उपचारांअभावी मृत्यू

राहुरीःतालुक्यातील पश्चिम भागातील शेरी चिखलठाण येथील एका अल्पवयीन मुलीचा बलात्कारानंतर अडीच महिन्यांनी अखेर मृत्यू झाला. बलात्कारानंतर तिला उपचारासाठी पुण्याच्या रुग्णालयात आणण्यात आले होते. मात्र, उपचारांसाठी पैसे नसल्याने तिला घरी आणण्यात आले होते. अखेर दोन दिवसांपूर्वी तिने अखेरचा श्वास घेतला. या प्रकरणी तुरुंगात असलेल्या आरोपीवर खुनाचा गुन्हा दाखल होणार का याकडे तालुक्याचे लक्ष लागले आहे.

या संदर्भात अधिक महिती अशी की, चिखलठाण येथील एका मुलीवर पप्पू अनिल चिकणे याने बलात्कार करून मारहाण केली होती. त्यात ही मुलगी मेंदूला मार लागून गंभीर जखमी झाली होती. पीडित मुलीला पुणे येथील रुग्णालयात दाखल करण्यात आले होते. मात्र, महागडे उपचार व अन्य खर्चासाठी समस्या येत असल्याने तिला पुन्हा घरी आणण्यात आले. त्यानंतर २० नोव्हेंबर रोजी तिचा मृत्यू झाला. पोलिस निरीक्षक प्रमोद वाघ यांनी सांगितले की, मृत मुलीच्या पालकांचा जबाब नोंदविला जाईल.