बोठेच्या आयफोनचे लॉक उघडेना

म. टा. प्रतिनिधी, नगर

रेखा जरे यांच्या हत्या प्रकरणातील मुख्य आरोपी पत्रकार बाळ ज. बोठे याचा आयफोन तपासासाठी पोलिसांनी पूर्वीच जप्त केला आहे. मात्र, त्याचे लॉक उघडण्यात पोलिसांना यश येत नसल्याने त्यातील माहिती तपासासाठी उपलब्ध होत नसल्याची अडचण पोलिसांपुढे आली आहे, अशी माहिती तपास अधिकारी पोलिस उपअधीक्षक अजित पाटील यांनी गुरुवारी दिली.

बोठे याने अटकपूर्व जामीनासाठी केलेला अर्ज जिल्हा व सत्र न्यायालयाने फेटाळला आहे. त्याच्या वतीने आता उच्च न्यायालयात जाण्याची तयारी सुरू असल्याची माहिती मिळाली. त्याचा ठावठिकाणा अद्याप पोलिसांना लागलेला नाही. त्यामुळे या प्रकरणाचा तपासही थंडावला आहे.