राज्य सहकारी बँकेकडून मिळणार साखर तारणावर जास्त रक्कम
म. टा. प्रतिनिधी, नगर
खुल्या बाजारात साखरेची विक्रीची किमान किंमत वाढवून ३ हजार १०० रुपये क्विंटल केल्यानंतर आता राज्य सहकारी बँकेने साखर तारणावर प्रतिक्विंटल १०० रुपये रक्कम वाढविली आहे. त्यामुळे साखर कारखान्यांना साखर तारणावर जास्त रक्कम मिळणार असल्याने कारखान्यांना काही प्रमाणात दिलासा मिळणार आहे. जास्त रक्कम मिळाल्याने कारखान्यांकडून ऊस उत्पादकांचे थकीत रक्कम मिळण्यास मदत होणार आहे.
यंदाच्या हंगामामध्ये राज्यमध्ये साखर उत्पादन विक्रमी झाले आहे. नगर जिल्ह्यामध्येच १ कोटी १२ लाख क्विंटल साखरेचे उत्पादन झालेले आहे. जास्त साखर उत्पादनामुळे बाजारात साखरेला मागणी नसल्याने गेल्या हंगामातील व यंदाच्या हंगामातील सुमारे ८० टक्के साखर कारखान्यांच्या गोदामामध्ये पडून आहे. साखर विक्री होत नाही. तसेच राज्य सहकारी बँकेकडून बाजारात साखर किमतीनुसार साखर तारणावर पैसे मिळत होते. परंतु, ते पैसे कमी मिळत असल्याने साखर कारखान्यांकडे ऊस उत्पादकांना देण्यासाठी पैसे शिल्लक राहत नव्हते. त्यामुळे यंदाच्या गाळप हंगामात ऊस उत्पादकांना वेळेत पूर्ण रक्कम मिळालेली नाही. नगर जिल्ह्यातील १६ साखर कारखान्यांकडे तब्बल पाचशे कोटी रुपयांची एफआरपी थकलेली आहे. ही रक्कम कुठून द्यायची असा प्रश्न कारखान्यांना पडला होता. परंतु, साखर मुल्य वाढविल्यामुळे साखर कारखान्यांना काही प्रमाणात दिलासा मिळणार आहे. केंद्र सरकारने साखरेचे दर आणखी कोसळू नये म्हणून काही उपाययोजना केल्या आहेत. त्यानुसार साखरेची कमीत कमी विक्री किंमत २ हजार ९०० रुपये ठेवली होती. त्यापेक्षा कमी किमतीत कारखान्यांना साखर विक्री करता येणार नाही. आता किमान किंमत दोनशे रुपयांनी वाढवून ३ हजार १०० रुपये केली आहे. त्यामुळे साखर तारणावर कारखान्यांना प्रतिक्विंटल दोन हजार रुपयांपर्यंत रक्कम मिळणार आहे. यापूर्वी ती १ हजार ९०० रुपयांपर्यंत मिळत होती. शंभर रुपये जास्त रक्कम मिळणार असल्याने साखर कारखान्यांना ऊस उत्पादकांना देणे देण्यास मदत होणार आहे. नगर जिल्ह्या आतापर्यंत १ कोटी १२ लाख क्विंटल साखर उत्पादन झाले असून, आणखी महिना व सव्वा महिने साखर कारखाने सुरू राहणार आहे. त्यामुळे साखर उत्पादनात आणखी तीस लाख क्विंटलची भर पडणार आहे. त्यामुळे यंदा साखर कारखान्याचे गोदामे तुडुंब भरलेली राहणार आहेत.
आतापर्यंत साखर कारखान्यांचे उत्पादन
गाळप टनामध्ये-१ कोटी ४ लाख
साखर उत्पादन क्विंटलमध्ये-१ लाख १२ हजार
साखर कारखाने साखर उत्पादन क्विंटलमध्ये
कारखाना साखर उत्पादन (क्विंटलमध्ये)
संजीवनी ४ लाख ५८ हजार
काळे ४ लाख ८७० हजार
प्रवरा ६ लाख ९२ हजार
श्रीगोंदा ६ लाख ५५ हजार
थोरात ९ लाख ५३ हजार
ज्ञानेश्वर ९ लाख २९ हजार
अंबालिका १३ लाख ६९ हजार