४० रुग्णालयांना अतिक्रमण काढण्याचे आदेश

म. टा. प्रतिनिधी, नगर
नगरमधील रुग्णालयांच्या पार्किंग जागा मोकळ्या करण्याच्या मनपाने हाती घेतलेल्या मोहिमेत आता नव्याने ४० रुग्णालयांना नोटिसा बजावण्याची प्रक्रिया सुरू करण्यात आली आहे. या रुग्णालयांनी १५ दिवसात त्यांचे अतिक्रमण स्वतःहून काढण्याचे याद्वारे सांगितले जाणार आहे. तसेच जुन्या यादीतील राहिलेल्या ३५ रुग्णालयांतील अतिक्रमणे हटविण्याचे काम सोमवारपासून (१४ ऑगस्ट) सुरू केले जाणार आहे. जिल्हाधिकारी अभय महाजन व मनपा आयुक्त जी. सी. मंगळे यांनी आतापर्यंत झालेल्या कारवाईचा आढावा घेऊन तसे स्पष्ट आदेश शुक्रवारी दिले आहेत.

नगरमधील बेकायदेशीर रुग्णालये व त्यांनी पार्किंगसह अन्य जागांवर केलेल्या अतिक्रमणांच्या विरोधात येथील सामाजिक कार्यकर्ते शाकीर शेख यांनी खंडपीठात जनहित याचिका दाखल केली आहे. या याचिकेवर नुकत्याच झालेल्या सुनावणीत येत्या चार आठवड्यात सर्व कारवाई पूर्ण करण्याचे व त्यानंतर सविस्तर अहवाल सादर करण्याचे आदेश खंडपीठाने दिले आहेत. त्यामुळे आज मनपा अतिक्रमण निर्मूलन विभाग प्रमुख सुरेश इथापे व नगर रचना विभागाचे सहायक संचालक संतोष धोंगडे यांनी पुढील कारवाईबाबत मनपा आयुक्त मंगळे यांच्याशी चर्चा केली व त्यानंतर या तिघांनीही जिल्हाधिकारी महाजन यांची भेट घेऊन न्यायालयाचे आदेश व मनपाने पुढील कार्यवाहीच्या केलेल्या नियोजनाची माहिती दिली. त्यांनीही आवश्यक बंदोबस्त व अन्य प्रक्रिया पूर्ण करून कारवाई सुरू करण्याची सूचना केली.

मुदतीसाठी नोटिसा

महापालिकेने मागील वर्षी १२१ रुग्णालयांची सुनावणी घेतली आहे. त्यापैकी मनपा नगर रचना विभागाने अंतिम अहवाल दिलेल्या ५२ रुग्णालयांवरील कारवाई पहिल्या टप्प्यात राबवली गेली. राहिलेल्या ६९ रुग्णालयांतील ४० रुग्णालयांबाबत नगर रचना विभागाने अंतिम अहवाल दिला आहे. त्यामुळे आता या रुग्णालयांना अंतिम नोटिसा देण्याची प्रक्रिया सुरू करण्यात आली आहे. ‘१५ दिवसात संबंधित रुग्णालयांनी पार्किंग व अन्य जागांवर केलेले अतिक्रमण स्वतःहून काढून घ्यावे व तसे झाले नाही तर मनपाद्वारे ते हटवले जाईल’, असे स्पष्ट करणाऱ्या या नोटिसा आहेत. याशिवाय मागच्य़ा सुनावणीच्यावेळी प्रत्यक्ष अतिक्रमणे हटविण्यासाठी खंडपीठाने दिलेल्या १० ऑगस्टच्या मुदतीत १७ रुग्णालयांच्या पार्किंग जागांवर कारवाई केली गेली असली तरी राहिलेल्या ३५ रुग्णालयांवरील कारवाई येत्या सोमवारपासून सुरू केली जाणार आहे.

अहवालानंतर कारवाई

मनपाने १२१ रुग्णालयांची सुनावणी घेताना बांधकाम पूर्णत्व दाखला नसण्यासह पार्किंग जागांमध्ये मेडिकल दुकान वा अन्य वैद्यकीय कक्षांबाबत डॉक्टरांचे म्हणणे जाणून घेतले. तसेच मनपाच्या आरोग्य विभागानेही मागील वर्षी या रुग्णालयांना दिलेल्या नोटिसांना उत्तर देताना स्वतःहून सर्व त्रुटींची पूर्तता करण्याची ग्वाही त्यांच्याकडून दिली गेली असल्याने, त्याबाबतचाही आढावा घेण्यात आला. त्यानंतर नगर रचना विभागाद्वारे या रुग्णालयांच्या प्रत्यक्ष बांधकामाची पाहणी करून अंतिम अहवाल दिल्यानंतर पहिल्या टप्प्यात ५२ रुग्णालयांची यादी निश्चित करण्यात आली होती. आता राहिलेल्या ६९ पैकी ४० रुग्णालयांबाबतही अंतिम पाहणी अहवाल नगररचना विभागाने दिला आहे. राहिलेल्या २९ रुग्णालयांबाबत नगर रचना विभागाद्वारे तपासणीही सुरू केली गेली आहे.

सुट्ट्यांचा अडथळा

खंडपीठाने चार आठवड्यात सर्व कारवाई अंतिम करण्याचे आदेश दिले असले तरी या काळात तब्बल १२ सार्वजनिक सुट्ट्या असल्याने मनपाला केवळ १६ दिवसच प्रत्यक्ष कारवाईला मिळणार आहेत. तशात आता खंडपीठाच्या मुदतीत मनपावर अंतिम कारवाईची टांगती तलवार आहे. यातच दहीहंडी व गणेश उत्सव मंडप उभारणी परवानगीची कामेही असल्याने मनपा प्रशासकीय यंत्रणेत धावपळ सुरू आहे.

स्वतःहून तयारी

इंडियन मेडिकल असोसिएशनचे पदाधिकारी डॉ. बापूसाहेब कांडेकर, डॉ. एस. एस. दीपक, डॉ. रवींद्र सोमाणी व अन्य काहींनी आज मनपा आयुक्त तसेच नगररचना विभागाच्या अधिकाऱ्यांची भेट घेतली. सुरू असलेल्या अतिक्रमण हटाव कारवाईतील शिथिलतेबाबत त्यांच्याकडून काहीच सकारात्मक प्रतिसाद मिळाला नसल्याने अखेर सर्व संबंधित रुग्णालयांनी आपापल्या जागेतील अतिक्रमणे स्वतःहून हटविण्याचा निर्णय घेण्यात आल्याचे सूत्रांकडून सांगण्यात आले.