जिल्ह्यातील नादुरुस्त हातपंपांची होणार दुरुस्ती

म. टा. प्रतिनिधी, नगर

जिल्ह्याच्या ग्रामीण भागातील नादुरुस्त असलेल्या हातपंपांची दुरुस्ती करण्याचा निर्णय जिल्हा परिषदेने घेतला आहे. या कामासाठी संस्थेची निवीदा मंजूर करण्यात आली आहे. या कामासाठी जिल्हा परिषदेच्या सेस फंडातून खर्च केला जाणार आहे. जिल्ह्यात उन्हाची तीव्रता जाणवू लागल्याने गावातील नादुरुस्त पंपांची यादी तयार करुन पंचायत समित्यांना सादर करण्याच्या सूचना जिल्हा परिषदेने दिल्या आहेत.

जिल्ह्यात आजमितीस ९ हजाकर ८५० हातपंप आहेत. या पंपांद्वारे ग्रामीण भागातील नागरिकांची पाण्याची सोय होते. बऱ्याचदा पंप नादुरुस्त झालेले असतात. त्यामुळे पाणी असतानाही नागरिकांना पाण्यासाठी भटकंती करावी लागते. उन्हाळ्याच्या दिवसात तर नागरिकांचे हाल होतात. मार्च महिन्यातील उन्हाळा जाणवू लागल्याने या हातपंपांची दुरुस्ती केली जाणार आहे. यासाठी ग्रामपंचायतींनी त्यांच्या हद्दीतील नादुरुस्त पंपांची यादी तयार करुन पंचायत समितीस सादर करण्याच्या सूचना जिल्हा परिषदेने दिल्या आहेत. पंचायत समितीकडून संबंधित संस्थेच्या मोबाइल टीमला नादुरुस्त पंपांची माहिती दिली जाईल. तेथून पुढे या टीमद्वारे संबंधित पंपांची दुरुस्ती केली जाणार आहे. तसेच प्रत्येक तालुक्यात दुरुस्ती कर्मचारीही नियुक्त केले जाणार असल्याचे सांगण्यात आले.

पाणीपट्टी वसूल करा

जिल्ह्यातील बऱ्याच पाणीयोजनांची पाणीपट्टी वसूल होत नाही. त्यामुळे योजनांची देखभाल दुरुस्ती करता येत नाही. वीजबिलही भरता येत नसल्याने वीज कनेक्शन कट केले जाते. त्यामुळे पाणपट्टीची वसुली करण्यावर आता भर दिला जाणार आहे. पाणीपुरवठा विभाग व ग्रामपंचायत विभागाच्या अधिकाऱ्यांनी याबाबत नियोजन करण्याच्या सूचना जिल्हा परिषदेने दिल्या आहे.