अधिकाऱ्यांच्या बैठकित खासदार विखेंची सूचना
म. टा. प्रतिनिधी,नगर
'नगर शहरातील व जिल्ह्यातील बहुतांश रस्त्यांची दुरवस्था झाली आहे. हा प्रकार सहनशीलतेच्या पलिकडे गेला आहे. त्यामुळे संबंधित विभागांनी जिल्ह्यातील सर्व रस्त्यांची तातडीने दुरुस्ती करून ते वाहतुकीसाठी सुयोग्य करावेत,' अशा सूचना खासदार डॉ. सुजय विखे यांनी राष्ट्रीय महामार्ग प्राधिकरण व बांधकाम विभागाच्या अधिकाऱ्यांना दिल्या. 'संबंधित सर्व विभागांनी कामे तातडीने पूर्ण करावीत. लोकांच्या सहनशीलतेचा अंत पाहू नये,' असेही ते म्हणाले.
शहरासह जिल्ह्यातील रस्त्यांच्या कामांचा आढावा घेण्यासाठी नगर येथे विखे यांनी विविध विभागांची बैठक घेतली. बैठकीला प्रादेशिक विभाग नाशिकचे मुख्य अभियंता पी.बी भोसले, अधिक्षक अभियंता जी.एस मोहीते, अभियंता एन. एन. राजगुरू, ए. बी. चव्हाण, प्रांताधिकारी श्रीनिवास अर्जुन, सुरेश भोसले यांच्यासह बांधकाम विभाग, राष्ट्रीय महामार्ग प्राधिकरण, अशा विविध विभागाचे अधिकारी उपस्थित होते. या बैठकीत विखे यांनी रस्त्यांच्या कामाबाबत गांभिर्याने कार्यवाही करावी लागेल, असे सांगितले. 'दळणवळणाच्या दृष्टीने नगर शहरासह जिल्ह्यातील मार्ग हे सुस्थितीत असावे, यासाठी कामाचा दर्जा राखावा. अर्धवट राहिलेली रस्त्यांची सर्व कामे कालबध्द नियोजन करुन पूर्ण करावीत. नगर शहरातील भुयारी गटारींची कामे पूर्ण करुनच रस्त्यांच्या कामांना सुरुवात करावी,' असेही निर्देश विखे यांनी दिले. 'शहरातून जाणाऱ्या सर्व राज्य व राष्ट्रीय महामार्गांच्या दुरुस्तीच्या कामांचा कालबद्ध कार्यक्रम हाती घ्यावा. जिल्ह्यातील सर्व बाह्यवळण रस्त्यांच्या दुरुस्तीचे काम १५ डिसेंबरपर्यंत पूर्ण करावेत. सरकारकडे प्रलंबित असलेल्या रस्त्यांच्या कामांचे प्रस्ताव पाठपुरावा करुन मार्गी लावावेत. शहरात अतिरिक्त वाहतुकीचा ताण दिवसेंदिवस वाढत आहे. त्यामुळे नवीन बाह्यवळण रस्त्याचे सर्वेक्षण तसेच बाह्यवळण रस्त्याची दुरुस्ती तातडीने करावी,' अशा सूचनाही त्यांनी दिल्या.