अन्य समाजांच्या आरक्षणाला
धक्का लागता कामा नये
विखेंची आयोगाकडे मागणी
म. टा. प्रतिनिधी, नगर
महाराष्ट्र मागासवर्ग आयोगाने मराठा समाजाला आरक्षण देण्याची शिफारस करावी, अशी मागणी विरोधी पक्षनेते राधाकृष्ण विखे यांनी बुधवारी येथे केली. मात्र, मराठा समाजाला आरक्षण देताना इतर समाजांना कायद्यानुसार मिळालेल्या आरक्षणाला धक्का लागता कामा नये, असेही त्यांनी स्पष्ट केले.
नगर येथे महाराष्ट्र मागासवर्ग आयोगाने मराठा आरक्षणासंदर्भात विविध संस्था व संघटनांची बाजू बुधवारी ऐकून घेतली. विखे यांनीही सविस्तर निवेदनाच्या माध्यमातून आयोगापुढे भूमिका मांडली. यावेळी बोलताना मराठा समाजाला आरक्षण देण्याची गरज व समाजातील विविध प्रश्नांचे गांभीर्य त्यांनी स्पष्ट केले. शेतकरी, शेतमजूर, महिला आणि युवकांपुढे असलेली आर्थिक, सामाजिक आव्हाने विचारात घेता शासनाने तातडीने आरक्षणाचा निर्णय करण्याची मागणी त्यांनी केली. विधानसभेच्या प्रत्येक अधिवेशनात मराठा आरक्षणाच्या प्रश्नाबाबत सरकारकडे पाठपुरावा केला. मराठा संघटनांनी काढलेल्या मोर्चांमुळे सरकारने आता आयोगाच्या माध्यमातून आरक्षणाच्या मागणीबाबत हालचाली सुरू केल्या असल्या तरी जोवर निर्णय होत नाही, तोवर सरकारची प्रामाणिकता स्पष्ट होणार नाही, याकडे विखे यांनी आयोगाच्या सदस्यांचे लक्ष वेधले. मराठा समाजाला आरक्षण देण्यासाठी शासनाने सर्वेक्षण करताना सर्वेक्षणाचे काम संघाशी निगडीत संस्थांना देण्याचा निर्णय झाला. संघाची मूळ विचारधाराच आरक्षणविरोधी असल्याने या निर्णयाला यापूर्वीच विरोध केला आहे. ज्यांची आरक्षणाबाबत भूमिका स्पष्ट नाही, त्यांच्याकडून मराठा समाजाच्या आरक्षणाबाबत सकारात्मक सर्वेक्षण होईल की नाही, अशी शंका विखे यांनी आयोगापुढे उपस्थित केली. हे सर्वेक्षण टाटा इन्स्टिट्यूट, गोखले इन्स्टिटय़ूटसारख्या नामवंत संस्थांच्या माध्यमातून होणे गरजेचे असल्याचे मतही त्यांनी यावेळी व्यक्त केले.
--