५८ वाळू साठ्यांच्या किमती घटवून लिलाव

म. टा. प्रतिनिधी, नगर
नद्यांतील वाळूसाठ्यांचा पाच वेळा लिलाव आयोजित करून वाळूसाठे विकले गेले नसल्याने जिल्हा प्रशासनाला वाळूसाठ्यांचा किंमती २५ टक्कांनी कमी कराव्या लागल्या आहेत. किंमती कमी करून सहाव्यांदा आता ५८ वाळू साठ्यांचा लिलाव आयोजित करण्यात आला आहे. किंमती कमी झाल्यावर तरीही वाळूसाठ्यांवर बोली लागेल, अशी अपेक्षा जिल्हा प्रशासनाला आहे.
जिल्ह्यात या वर्षी ६९ वाळूसाठ्यांचे लिलाव पाच वेळा आयोजित केले होते. त्यातून ११ वाळूसाठे पाच कोटी रुपयांना विकले गेले आहेत. पाच वेळा लिलाव आयोजित करून वाळूसाठ्यांची विक्री न झाल्यास वाळूसाठ्यांच्या मूळ किंमतीत २५ टक्के किंमत कमी करून लिलाव आयोजित करण्यात येतात. त्यानुसार किंमती करून जिल्ह्यातील ५८ वाळूसाठ्यांचा लिलाव आयोजित करण्यात आला आहे. या वाळूसाठ्यात ३ लाख ७६ हजार ब्रॉस वाळू असून, तिची किंमत ५५ कोटी ५९ लाख इतकी ठेवण्यात आली आहे. आनलाइन वाळूलिलाव २२ फेब्रुवारी ठेवण्यात आला आहे. या लिलावात राहुरी तालुक्यातील बारा साठे असून, या साठ्यांची किंमत १२ कोटी ३० लाख ८७ हजार इतकी आहे. पारनेरमधील आठ वाळूसाठ्यांच्या किंमती १० कोटी रुपये ठेवण्यात आल्या आहेत. राहाता तालुक्यातील दहा वाळूसाठ्यांमध्ये १ लाख १० ब्रास वाळू असून, या साठ्यांची किंमत १६ कोटी ३३ लाख रुपये आहे. श्रीरामपूरमधील ५ वाळूसाठ्यांची किंमत २ कोटी, तर जामखेडमधून सहा वाळूसाठ्यांचा किंमती ४ कोटी ७८ लाख रुपये आहे. किंमती कमी झाल्याने वाळूसाठ्यांवर ठेकेदारांकडून बोली लावली जाईल, अशी अपेक्षा जिल्हा प्रशासनाची आहे. या साठ्यांव्यतिरिक्त कोपरगावमधील दोन वाळूसाठे व श्रीरामपूरमधील एक वाळूसाठ्यांचे पहिला लिलाव २२ फेब्रुवारीला होणार आहे.
जिल्हा परिषद व पंचायत समितीच्या निवडणुकीच्या काळात महसूल व पोलिस यंत्रणा या निवडणुकीच्या कामात व्यस्त होत्या. त्या काळात अनेक नद्यांमधून बेकायदेशीर वाळू उपसा झाला आहे. आता मतमोजणी झाल्यानंतर पुन्हा महसूल यंत्रणा व पोलिसांना बेकायदेशीर वाळूउपसा रोखण्यासाठी मोहिम हाती घ्यावी लागणार आहे.