‘माणुसकीची भिंत’ला प्रतिसाद

म. टा. प्रतिनिधी, नगर
घरातील दैनंदिन वापरातील व नको असलेल्या चांगल्या वस्तू गरीबांना देऊन टाकण्याच्या ‘माणुसकीची भिंत’ उपक्रमास केडगाव-भूषणनगर येथे प्रतिसाद मिळाला. लहान मुलांचे कपडे, पादत्राणे, कमरेचे पट्टे व अन्य गृहोपयोगी वस्तू घेण्यासाठी नागरिकांची गर्दी झाली होती.
भूषणनगर येथे शिवसेनेचे शहर प्रमुख दिलीप सातपुते यांच्या मित्रमंडळाच्या पुढाकाराने ‘माणुसकीची भिंत’ उपक्रम झाला. सातपुते व त्यांच्या मित्रांनी भूषणनगर व केडगाव परिसरात फिरून नागरिकांमध्ये जागृती केली होती. घरातील नको असलेल्या, पण चांगल्या स्थितीतील वस्तू गरीबांना देण्यासाठीच्या उपक्रमात सहभागाचे आवाहन केले होते. त्यासही चांगला प्रतिसाद मिळाला. भूषणनगर येथे नुकत्याच झालेल्या या उपक्रमास सातपुते यांच्यासह राजू भापकर, संदीप गाडगे, अमोल वाळके, अभय दळवी, सोनू कांबळे, संकेत जाधव, पप्पू भाले, प्रवीण बर्वे,जोसेफ डिसोझा, रमेश परतानी, अविनाश मेहेर, संजय कोतकर, प्रशांत वाघमारे, नंदू ठुबे, साहेबराव विधाते, वसंत शिंदे आदींसह अन्य उपस्थित होते. या पहिल्याच उपक्रमाला चांगला प्रतिसाद मिळाल्याने आता दर महिन्याला केडगाव-भूषणनगर येथे ‘माणुसकीची भिंत’ उपक्रम होणार असून, ज्यांना घरातील वापरात नसलेल्या जुन्या, पण चांगल्या वस्तू-कपडे व अन्य साहित्य द्यायचे आहे, त्यांनी संपर्क साधण्याचे आवाहन करण्यात आले आहे.