प्रेमदान चौकात केले वाहतूक नियंत्रण
म. टा. प्रतिनिधी, नगर
सावेडीतील प्रेमदान चौकामध्ये बुधवारी सायंकाळी साडेचारच्या सुमारास सायकल रॅलीचे स्वागत करण्यासाठी गेलेले सेवानिवृत्त शिक्षक नंदकुमार देशपांडे यांनी चौकातील वाहतूक नियंत्रण करीत वाहनचालकांना वाहतुकीचे नियम पाळण्याची विनंती केली. वाहनचालकांनी देखील त्यांच्या आवाहनाला प्रतिसाद देत त्यांना सहकार्य केले. याप्रकारामुळे मात्र काही काळासाठी का होईना प्रेमदान चौकामध्ये वाहतुकीचे एक शिस्तबद्द चित्र दिसले.
नगर-मनमाड महामार्गावर प्रेमदान चौक असून या चौकातील वाहतूक नियंत्रणात रहावी, यासाठी येथे सिग्नलही बसवण्यात आला आहे. मात्र, येथे अनेकदा वाहतूक पोलिस थांबत नसल्याने या चौकामध्ये सर्रास सिग्नल तोडण्याचे प्रकार सुरू असतात. बुधवारी सायंकाळी केंद्रीय विद्यालयातील सेवानिवृत्त शिक्षक व विद्यार्थी सहाय्यक समितीचे कार्यकर्ते नंदकुमार देशपांडे यांनी या चौकामध्ये जवळपास वीस मिनिटे वाहतूक नियंत्रण करून वाहनचालकांना वाहतुकीचे नियम पाळण्याची विनंती केली, व त्यांना वाहनचालकांकडून चांगला प्रतिसादही मिळाला.
रायगड येथून वर्ध्याच्या दिशेने निघालेली सायकल रॅली बुधवारी प्रेमदान चौकातून जाणार होती. या रॅलीचे विद्यार्थी सहायक समितीच्या वतीने स्वागत करण्यासाठी देशपांडे हे समितीच्या विद्यार्थ्यांसह प्रेमदान चौकामध्ये गेले होते. या चौकामध्ये ते एका बाजूला थांबलेले असताना बहुतांश वाहनचालक सर्रास सिग्नल तोडून वेगाने निघून जात असल्याचे दिसले. त्यामुळे देशपांडे यांनी स्वतः चौकामध्ये उभे राहुन वाहतूक नियंत्रण करण्यास सुरुवात केली. सिग्नल मोडण्याचा प्रयत्न करणाऱ्या वाहनचालकांना थांबवून ते वाहतुकीचे नियम पाळण्याची विनंती करू लागले. 'सिग्नलवर एक ते दीड मिनिटे थांबल्यामुळे कोणताही फरक पडणार नाही, मात्र सिग्नल तोडून जाताना अपघाताचा धोका आहे,' हे ते वाहनचालकांना पटवून देऊ लागले. अखेर वाहनचालकांनी देखील सिग्नल सुरू असताना आपली वाहने थांबवत त्यांना सहकार्य केले. जवळपास वीस मिनिटे देशपांडे हे प्रेमदान चौकामध्ये वाहतूक नियंत्रण करीत होते. यानिमित्ताने मात्र या चौकातील वाहतूक थोड्या वेळासाठी का होईना, पण शिस्तीमध्ये सुरू होती.