आरटीओची ४७३ वाहनांवर कारवाई

म. टा. प्रतिनिधी, नगर
राज्याच्या परिवहन आयुक्तांनी वाहनांची तपासणी करण्याचे आदेश दिल्यानंतर येथील आरटीओ कार्यालयाने वाहनांची तपासणी मोहीम हाती घेतली आहे. या मोहिमेच्या पाच दिवसात ४७३ वाहनांवर कारवाई करत वाहन चालकांकडून २६ हजार ५०० रुपये दंड वसूल करण्यात आला आहे.
जिल्ह्यात घडणाऱ्या अपघातांचे प्रमाण कमी व्हावे. वाहतूक नियमांचे काटेकोर पालन व्हावे, यासाठी उपप्रादेशिक परिवहन विभागामार्फत विविध उपक्रम राबविण्यात येतात. वाहतूक नियमांचे उल्लंघन करणाऱ्या वाहनचालकांवर कारवाई करण्याची मोहीमही राबविली जाते. याचाच भाग म्हणून वाहतूक सुरक्षा सप्ताह साजरा करण्यात येतो. जिल्ह्यात १८ ते २२ सप्टेंबर या कालावधीत विशेष तपासणी मोहीम राबविण्याच्या सूचना होत्या. त्यानुसार येथील आरटीओने वाहनांची तपासणी केली. वाहनांवर कारवाई करण्यासाठी आरटीओमार्फत पथक नेमण्यात आले. यामध्ये तीन मोटार वाहन निरीक्षक अधिकारी व तीन सहाय्यक मोटार वाहन निरीक्षक यांचा समावेश करण्यात आला. शहरातील मुख्य महामार्ग तसेच जिल्ह्यातील सात तालुक्यातील वाहनांची तपासणी करण्यात आली. यामध्ये लायसन मुदत समाप्त १२७, इन्शुरन्स सर्टिफिकेट १२२, विनाहेल्मेट ८३, नियमबाह्य नंबर प्लेट ५४, सीटबेल्ट १६, प्रखर दिवे बसविणे ४, कर्णकर्कश हॉर्न असे ८ वाहने, दुचाकीवर दोन पेक्षा जास्त प्रवासी अशा ४१, चोरटी प्रवासी वाहतूक १६, बेशिस्त वाहन चालविणे २ अशा एकूण ४७३ वाहनांवर कारवाई करत सव्वीस हजार पाचशे रुपयांचा दंड वसूल करण्यात आले आहे. कारवाईतंर्गत असलेल्या वाहनधारकांनी वाहनाची कागदपत्रे सात दिवसाच्या आत कार्यालयात सादर करण्याचे आदेश देण्यात आले आहे.