शिर्डी संस्थानला ‘आरटीओ’ची नोटीस

म. टा. प्रतिनिधी, नगर

शिर्डीच्या साईबाबा संस्थानच्या मालकीच्या वाहनावर 'महाराष्ट्र शासन' असे लिहिता येणार नाही. वाहनावर असे लिहिले असेल ते काढून टाकून अहवाल द्यावा, अशी नोटीस श्रीरामपूरच्या उप प्रादेशिक परिवहन कार्यालयाने शिर्डी संस्थानला पाठविली आहे.

सामाजिक कार्यकर्ते संजय काळे यांनी यासंबंधी तक्रार केली होती. त्यानुसार शिर्डी संस्थानच्या मालकीच्या वाहनांवर (क्र. एमएच १७ एजे ८८८९ व एमएच १७ बीव्ही १५१०) पुढील बाजूला 'महाराष्ट्र शासन' असे लिहिले आहे. वास्तविक पाहता राज्य सरकारची मालकी असलेल्या व त्या नावाने नोंदणी झालेल्या वाहनांवरच असे लिहिता येते, अशी काळे यांची तक्रार होती. ही वाहने संस्थानचे मुख्य कार्यकारी अधिकारी आणि अन्य अधिकारी वापरतात.

काळे यांच्या या तक्रारीची दखल घेऊन श्रीरामपूरचे उप प्रादेशिक परिवहन अधिकारी ए. ए. खान यांनी संस्थानला नोटीस पाठविली आहे. त्यांनी म्हटले आहे की, नियमानुसार संस्थानच्या वाहनांवर सरकारचे नाव टाकता येणार नाही. त्यामुळे ते काढून टाकावे आणि सात दिवसांच्या आत या कार्यालयास अहवाल द्यावा; अन्यथा, नियमाचा भंग केला म्हणून संबंधित वाहनांची नोंदणी रद्द करण्यात येईल.