सचिन चौधरीने केला गोळीबाराचा बनाव

श्रीगोंदे : श्रीगोंदा तालुक्यातील राजापूर येथील भाजप कार्यकर्ते सचिन चौधरी यांच्यावर झालेला गोळीबार हा बनाव असल्याचे उघड झाले आहे. फिर्यादी चौधरी यानीच हा बनाव केल्याचे पोलिस तपासात निष्पन्न झाले आहे.
२३ मार्चच्या रात्री दोन वाजनेच्या सुमारास आपल्यावर दोन ते तीन लोकांनी गोळीबार केल्याची फिर्याद भाजप कार्यकर्ते सचिन चौधरी यांनी दिली होती. गोळीबाराचा गुन्हा दाखल झाल्यानंतर सहाय्यक पोलिस निरीक्षक सचिन वांगडे यांनी आबासाहेब झावरे, राहुल मोदळे, शिवलिंग लोंढे, दादाराम म्हस्के या पोलिस कर्मचाऱ्यांच्या मदतीने राजापूर येथील घटना स्थळाची कसून पाहणी केली असता तेथे त्यांना बिअरची एक फुटलेली बाटली व बाजूलाच रक्ताने माखलेला काचेचा तुकडा आढळून आला.
पोलिस पथकाने दवाखान्यात जाऊन फिर्यादी सचिन चौधरी याची कसून चौकशी करून रक्ताने माखलेले काचेचे तुकडे दाखवले असता चौधरींची भंबेरी उडाली आणि हे कृत्य स्वत:च वैयक्तिक ताणतणावातून केले असल्याची कबुली चौधरी याने दिली.
फिर्यादी चौधरी यानेच गोळीबाराचा बनाव केल्याचे तपासात निष्पन्न झाल्याचे सहाय्यक पोलिस निरीक्षक वांगडे यांनी सांगून चौधरी याने खोटी फिर्याद देऊन पोलिस यंत्रणेला वेठीस धरले. याबाबत फिर्यादी चौधरी यांचे विरुध्द गुन्हा दाखल करण्यासाठी न्यायालयाची मंजुरी घेण्यात येणार असल्याचे वांगडे यांनी सांगितले.