डीएसपी चौकातील सरकारी निवासस्थानात 'वन स्टॉप सेंटर'
म. टा. प्रतिनिधी, नगर
संकटग्रस्त महिलांना मदत करण्यासाठी केंद्र सरकारचे वन स्टॉप सेंटर नगरमध्ये २६ जानेवारीपासून सुरू होणार आहे. या सेंटरला 'सखी' असे नाव देण्यात आले आहे. स्नेहालय ही संस्था हे सेंटर चालविणार आहे. हे सेंटर दोन वर्षांपूर्वीच मंजूर करण्यात आले होते. परंतु इमारत नसणे, इतर कागदपत्रांच्या अडचणीमुळे हे सेंटर सुरू होऊ शकले नव्हते.
संकटग्रस्त महिलांच्या मदतीसाठी केंद्र सरकारच्या महिला व बालकल्याण विभागाकडून 'वन स्टॉप सेंटर' ही योजना राबविण्यात येत आहे. याअंतर्गत महिलांना एकाच इमारतीमध्ये आरोग्य सेवा, विधी व समुपदेशन सेवा, आश्रय, निवारा, पोलिस मदत आदी सुविधा उपलब्ध करून दिल्या जातात. राज्यभरात अनेक ठिकाणी वन स्टॉप सेंटर सुरू झालेले आहे. नगरमधील सेंटरला अनेक अडचणी होत्या. दोन वर्षांपूर्वीच या सेंटरसाठी जागा मिळत नव्हती. हे सेंटर जिल्हा रुग्णालयाच्या परिसरात असणे बंधनकारक आहे. त्यानुसार जिल्हा रुग्णालयातील जागा मिळविण्यासाठी महिला व बालविकास विभागाने आरोग्य विभागाला प्रस्ताव दिला होता. गेल्या वर्षात हा प्रस्ताव मंजूर झाल्याने तीनशे चौरस मीटर जागेत वन स्टॉप सेंटर उभारण्याचा मार्ग मोकळा झाला आहे. हे सेंटर उभारण्यासाठी निधी उपलब्ध झाला असला तरी बांधकाम होण्यासाठी वेळ लागणार आहे. त्यामुळे हे सेंटर तात्पुरत्या स्वरूपात डीएसपी चौकाजवळील सरकारी निवासस्थानाच्या इमारतीमध्ये सुरू करण्यात येणार आहे. हे सेंटर स्नेहालय संस्थेला चालविण्यासाठी देण्यात आले आहे. स्नेहालयला दर महिन्यासाठी दोन लाख रुपयांचे अनुदान महिला व बालविकास कार्यालयाकडून देण्यात येणार आहे. या सेंटरमध्ये समुपदेशक, वकिल, निवृत्त पोलिस अधिकारी, क्लार्क, सुरक्षारक्षक नेणण्याची जबाबदारी नेमलेल्या संस्थेची आहे. येत्या २६ जानेवारी रोजी पालकमंत्री व ग्रामविकासमंत्री हसन मुश्रीफ यांच्या हस्ते वन स्टॉप सेंटरचे उद्घाटनाचे नियोजन करण्यात येत आहे.
कोट
केंद्र सरकारच्या महिला व बालविकास विभागाकडून या सेंटरसाठी निधी उपलब्ध झाला होता. परंतु जागा उपलब्ध नसल्याने हे सेंटर सुरू करण्यास अडचणी आल्या होत्या. या सेंटरसाठी जिल्हा रुग्णालयातील जागा मंजूर झाली आहे. त्या ठिकाणी इमारतीचे बांधकाम होणार आहे. त्यात्पुरत्या स्वरूपात हे सेंटर सरकारी निवासस्थानच्या एका इमारतीमध्ये येत्या २६ जानेवारीपासून सुरू होणार आहे.
विजयमाला माने, महिला व बालविकास अधिकारी
'दिलासा सेल' सुरूच राहणार
संकटग्रस्त महिला, ज्येष्ठ नागरिक, पुरुषांच्या तक्रारी सोडविण्यासाठी दोन वर्षांपूर्वी पोलिस दलाने वन स्टॉप सेंटर सुरू केले आहे. या सेंटरला दिलासा सेल असे नाव देण्यात आले आहे. पोलिसांच्या इमारतीमध्ये हे सेंटर असून, पोलिस कर्मचारी, अधिकारी असे १५ जणांची नेमणूक दिलासा सेलमघ्ये आहे. महिला व बालकल्याण विभागाचे वन स्टप सेंटर व पोलिसांचे दिलासा सेल हे दोन्ही वेगवेगळ्या बाबी आहेत. त्यामुळे पोलिसांचा दिलासा सेल पहिल्या प्रमाणेच पिडित महिलांच्या तक्रारीबाबत कार्यवाही करेल, अशी माहिती स्थानिक गुन्हे शाखेचे पोलिस निरीक्षक दिलीप पवार यांनी दिली.