‘समृद्धी’साठी ३५९ हेक्टर जमीन घेणार

म. टा. प्रतिनिधी, नगर

मुख्यमंत्र्यांचे ड्रीम प्रोजेक्ट असलेल्या महाराष्ट्र समृद्धी द्रुतगती महामार्गासाठी आवश्यक असणाऱ्या जमिनीच्या संयुक्त मोजणीचे काम पूर्ण झाले असून, कोपरगाव तालुक्यातील दहा गावांतील ३५९ हेक्टर जमिनीचे भूसंपादन थेट खरेदी पद्धतीने होणार आहे. या खरेदीसाठी दर जाहीर करून खरेदीसाठी कार्यवाही सुरू झाली आहे. या गावांतील आठशे शेतकऱ्यांकडून जमीन खरेदी करावी लागणार आहे.

समृद्धी महामार्ग हा कोपरगाव तालुक्यातील दहा गावांतून जाणार असून, जिल्ह्यातून हा रस्ता २९ किलोमीटर ४०० मीटर असा अंतराचा जाणार आहे. या महामार्गासाठी नाशिक व औरंगाबाद जिल्ह्यात भूसंपादनसाठी दर जाहीर झाल्यानंतर कोपरगावातील शेतकऱ्यांसाठी दर दोन दिवसांपूर्वी जाहीर केला आहे. त्यानुसार वेगवेगळ्या गावांत वेगवेगळा दर निश्चित करण्यात आला असून, एकरी १३ लाख ६५ हजार ते २९ लाख ६८ हजार रुपयांचा मोबदला जमिनीच्या बदल्यात शेतकऱ्यांना मिळणार आहे. या तालुक्यातील देर्डे कोऱ्हाळे, घारी, डाऊच खुर्द, चांदेकसारे, जेऊर कुंभारी, कोकमठाण, संवत्सर, कान्हेगाव, भोजडे, धोत्रे या गावातील ३५९ हेक्टर जमिनी भूसंपादित होणार असून, २९ किलोमीटरचा रस्ता या भागातून जाणार असून, रस्त्याची रुंदी १२० मीटर इतकी आहे. त्यात सुमारे १८ हेक्टर ही शासकीय मालकीची जमीन आहे. तर ५.११ हेक्टर जमीन वनक्षेत्रातील घेणार आहे. या दहा गावांतील ८०४ शेतकऱ्यांची जमीन खरेदी केली जाणार आहे.

त्यात तीन गावांनी दर जाहीर होण्यापूर्वीच जमिनी देण्यास विरोध केला आहे. तर वेगवेगळ्या गावांत कमी दर दिलेला असल्याने गावांगावात शेतकऱ्यांचा गोंधळ निर्माण झाला असून, हा दर कसा दिला हे हे गणित शेतकऱ्यांना प्रशासनाला समजून सांगावे लागणार आहे. तर जमिनी थेट खरेदी करणे शक्य होणार आहे. येत्या महिन्याभरात येथील जमिनी खरेदी करण्याचे नियोजन प्रशासनाने केले आहे.