नगर : शहरातील स्टेशन रोड येथील सथ्था कॉलनी येथील शांतीनिकेतन नावाच्या घराच्या कपाउंडमध्ये घुसून चंदनाचे झाड तोडण्यात आले. चंदनाची लाकडे नेत असताना घरमालकाने हटकल्यानंतर चोरटे पसार झाले. पाच चोरटे असल्याने याप्रकरणी कोतवाली पोलिस स्टेशनला दरोड्याचा गुन्हा नोंदविण्यात आला आहे.
याप्रकरणी करण किशोर गांधी यांनी फिर्याद नोंदविली आहे. शनिवारी पहाटे गांधी कुटुंब घरात झोपले होते. त्या वेळी चोरटे राहत्या घराच्या कपाउंडमध्ये घुसले. कपाउंडमध्ये लावलेले चंदनाचे झाड तोडून त्याची लाकडे तोडून नेत होते. त्या वेळी करण गांधी यांनी चोरट्यांना हटकले. परंतु, एका चोरट्याने गांधी यांना, 'तू झोप रे, आरडाओरड करू नको', असा दम दिला. परंतु गांधी यांनी प्रतिकार केल्यानंतर चोरटे चंदनाची लाकडे टाकून पळून गेले. त्यानंतर गांधी यांनी पोलिसांना ही माहिती दिली. त्यानंतर कोतवाली पोलिस स्टेशनला गुन्हा नोंदविण्यात आला आहे.
दुचाकी चोरीला
शहरातील चितळे रोड येथील एका इमारतीसमोरून दिवसा दुचाकी चोरीला गेली. याप्रकरणी तोफखाना पोलिस स्टेशनला चोरट्याविरुद्ध चोरीचा गुन्हा नोंदविण्यात आला आहे. हार्दिक लखमीचंद जगड यांनी नेता सुभाष चौक येथील श्रीनातजी निवास येथे दुपारच्या वेळेस दुचाकी पार्क केली. त्या वेळी चोरट्याने दुचाकी चोरू नेली, असे फिर्यादीत म्हटले आहे.