कायदा, सुव्यवस्था ‘ती’च्या हाती

नगर ः मगील वर्षी शनिच्या चौथऱ्यावर महिलांना प्रवेश देण्याचा ऐतिहासिक निर्णय झालेल्या शनिशिंगणापूर येथील पोलिस स्टेशनची जबाबदारी आता एक महिला पोलिस अधिकारी पार पाडत आहे. महिनाभरापासून सहायक पोलिस निरीक्षक संगीता राऊत या शनिशिंगणापूरसह इतर आठ गावांची कायदा सुव्यवस्थेची जबाबदारी सांभाळत आहेत.

शनिशिंगणापूर येथे दोन वर्षांपूर्वी पोलिस स्टेशन सुरू झाले. या पोलिस स्टेशनच्या हद्दीत शनिशिंगणापूर व परिसरातील इतर आठ गावे आहेत. मागील वर्षी शनिच्या चौथऱ्यावर महिलांना प्रवेश देण्यासाठी भूमाता ब्रिगेडच्या तृप्ती देसाई यांनी आंदोलन केले होते. त्यानंतर चौथरा महिलांसाठी दर्शनासाठी खुला झाला होता. तर पहिल्यांदा देवस्थानच्या ट्रस्टच्या अध्यक्षपदी महिला म्हणून अनिता शेटे यांची नियुक्ती झाली होती. आता या पोलिस स्टेशनची जबाबदारी पोलिस अधीक्षक रंजनकुमार शर्मा यांनी सहायक पोलिस निरीक्षक संगीता राऊत या महिला अधिकाऱ्यावर दिली आहे. या पोलिस स्टेशनला पहिल्याच महिला अधिकारी मिळाल्या असून, पोलिस स्टेशनच्या जबाबदारी असलेल्या त्या एकमेव महिला अधिकारी जिल्ह्यात आहेत.

राऊत या मूळच्या नाशिक जिल्ह्यातील म्हसरुळ येथील असून, त्या २००९ मध्ये पोलिस खात्यात दाखल झाल्या. प्रशिक्षण संपल्यानंतर औरंगाबाद शहरातील मुकुंदवाडी पोलिस स्टेशनला रूजू झाल्या होत्या. त्या ठिकाणी चार वर्षे नोकरी केल्यानंतर २०१३ मध्ये सहायक पोलिस निरीक्षक म्हणून पदोन्नती मिळाल्यानंतर त्या नगर जिल्ह्यात बदलून आल्यानंतर शिर्डी पोलिस स्टेशनला रूजू झाल्या. संगमनेर, पाथर्डी या पोलिस स्टेशनला काम केले. आता पोलिस अधीक्षकांना राऊत यांना शनिशिंगणापूर देवस्थान असलेल्या पोलिस स्टेशनच्या अधिकारी म्हणूनच जबाबदारी दिली आहे. शनिशिंगणापूर मंदिराच्या सुरक्षेकडे लक्ष ठेवणे, राज्यातील व परराज्यातून येणाऱ्या त्रास देणाऱ्या एजंटांविरुद्ध प्रतिबंधात्मक कारवाई करण्याबरोबर पोलिस स्टेशनच्या हद्दीतील काही गावे हे नगर-औरंगाबाद हायवेवर आहेत. या भागात रात्री गस्त करावी लागते.

चौकट ः

पाच महिला पोलिस कर्मचारी

शनिशिंगणापूर हे जिल्ह्यातील तिसावे पोलिस स्टेशन असून, इतर पोलिस स्टेशनच्या तुलनेत या पोलिस स्टेशनच्या हद्दीत कमी म्हणजे नऊ गावे असली, तरी शनिशिंगणापूर येथे होणाऱ्या गर्दीमुळे या पोलिस स्टेशनवर जबाबदारी मोठी आहे. तीस पोलिस कर्मचारी पोलिस स्टेशन नियुक्तीला असून, त्यात पाच महिला पोलिस कर्मचारी आहेत.

कोट ः

पोलिस सेवेत दाखल झाल्यानंतर पोलिस स्टेशनची अधिकारी म्हणून पहिल्यांदाच शनिशिंगणापूर पोलिस स्टेशनची जबाबदारी मिळाली आहे. ही शनिशिंगणापूरची सेवा करण्याची संधी आहे. भाविकांना कायदा व सुव्यवस्थेच्या दृष्टीने कोणताही त्रास होणार नाही या दृष्टीने काम करत आहे.

- संगीता राऊत, सहायक पोलिस निरीक्षक, शनिशिंगणापूर