कुकींग गॅससाठी वनविभागाचे सात कोटी

म. टा. प्रतिनिधी, नगर

वनपरिक्षेत्रातील वृक्षतोड व वनांचा होणारा ऱ्हास थांबवण्यासाठी वनांलगत राहणाऱ्या सर्वसाधारण प्रवर्गातील कुटुंबांना सवलतीच्या दरात गॅस पुरवठा व दुभत्या जनावरांसाठी अनुदान मंजूर करण्यात आले आहे. या कुटुंबांसाठी सात कोटी रुपये अनुदान मिळणार असून वनविभागामार्फत लाभार्थ्यांची निवड केली जाणार आहे.

वनक्षेत्रावरील जळाऊ लाकडाच्या तोडीमुळे वनांवर होणारे दुष्परिणाम कमी करण्यासाठी तसेच वृक्ष लागवडीचे संरक्षण होण्यासाठी संयुक्त वनव्यवस्थापन समितीतच्या माध्यमातून वनांलगतच्या गावांतील आदिवासी तसेच अनुसूचित जातीच्या व बिगर मागासवर्गीय लोकांना लाभ होण्याच्या दृष्टीकोनातून सवलतीच्या दरात गॅस वाटप व दुभत्या जनावरांसाठी अनुदान वाटप योजना शासनाने सुरू केली आहे. या योजनेत लाभार्थ्यांकडून प्रस्ताव मागविण्यात येऊन त्यांना गॅसचा पुरवठा केला जातो. या योजनेसाठी या अगोदर काही निधी वितरीत करण्यात आला आहे. त्यानंतर आता पुन्हा सात कोटी निधी उपलब्ध करुन देण्यात आला आहे. वनविभागाकडून लाभार्थ्यांच्या निवडी होऊन त्यांना गॅसचे वाटप केले जाणार आहे. दरम्यान, हा निधी वितरीत करताना ज्या कामासाठी निधी दिला आहे त्याच कामासाठी निधी खर्च करण्यात यावा तसेच मागील वर्षात दिलेल्या निधीची उपयोगिता प्रमाणपत्रे सादर करण्याच्या सूचना वनविभागाने दिल्या आहेत.