सात अधिकाऱ्यांच्या जिल्ह्याबाहेर बदल्या

म. टा. प्रतिनिधी, नगर
जिल्ह्यातील सात सहायक पोलिस निरीक्षकांच्या जिल्ह्याबाहेर बदल्या करण्यात आल्या आहेत. त्यातील पाच जणांच्या बदल्या विनंतीवरून करण्यात आल्या असून दोघांचा कार्यकाळ पूर्ण झाला आहे. विनंती बदलीमध्ये नगर तालुका पोलिस ठाण्याचे प्रभारी अधिकारी प्रशांत मंडले यांचाही समावेश असून त्यांची बदली महामार्ग पोलिस विभागात करण्यात आली आहे.
राज्यातील सहायक पोलिस निरीक्षकांच्या बदल्यांचा आदेश पोलिस महासंचालकांनी काढला आहे. त्यामध्ये २५२ जणांची विनंतीवरून बदली करण्यात आली असून १७५ जणांचा कार्यकाळ पूर्ण झाल्याने त्यांच्या बदल्या करण्यात आल्या आहेत. याशिवाय ५०५ अधिकाऱ्यांचे बदल्यांचे अर्ज फेटाळण्यात आले असून त्यामध्ये नगर जिल्ह्यातील पाच अधिकाऱ्यांचा समावेश आहे. कार्यकाळ पूर्ण झाल्याने विलास पाटील यांची जालन्याला तर विलास कुलकर्णी यांची अमरावतीला बदली करण्यात आली आहे. विनंतीवरून बदली करण्यात आलेले अधिकारी पुढीलप्रमाणे- प्रशांत मंडले- महामार्ग पोलिस, महंमद मुसा- महामार्ग पोलिस, पुरूषोत्तम चौभे- लाचलुचपत प्रतिबंधक विभाग, नसिरूद्दीन शेख- नाशिक शहर व अरुण परदेशी नाशिक शहर.