पवारांचा जिल्ह्यातर्फे नागरी सत्कार

म. टा. प्रतिनिधी, नगर
राष्ट्रवादी काँग्रेसचे अध्यक्ष खासदार शरद पवार यांना पद्मविभूषण किताब मिळाल्याने त्यांचा नगर जिल्ह्याच्या वतीने नागरी सत्कार करण्यात येणार आहे. येत्या २९ रोजी सकाळी १० वाजता भेंडा (ता. नेवासे) येथील ज्ञानेश्वर साखर कारखान्याच्या प्रांगणात हा समारंभ होणार आहे. तसेच माजी आमदार पांडुरंग अभंग यांच्या अमृत महोत्सवानिमित्त त्यांच्या जीवनावरील ‘शेतमळा ते विधानसभा’ या आत्मचरित्राचे प्रकाशनही यावेळी होणार आहे. जिल्हा राष्ट्रवादीद्वारे या दोन्ही कार्यक्रमांचे नियोजन सुरू करण्यात आले आहे.
राष्ट्रवादीचे जिल्हाध्यक्ष चंद्रशेखर घुले हे माजी आमदार पांडुरंग अभंग अमृत महोत्सव सोहळा संयोजन समितीचे अध्यक्ष आहेत. अमृत महोत्सव व पवार गौरव सोहळ्याचे नियोजन त्यांनी पक्षाच्या अन्य सदस्यांच्या मदतीने सुरू केले आहे. यासंदर्भात माहिती देताना ते म्हणाले, पक्षाध्यक्ष खासदार शरद पवार पद्मविभूषण किताब मिळाल्यानंतर प्रथमच जिल्ह्याच्या दौऱ्यावर येत आहेत. यानिमित्ताने त्यांचा सर्वपक्षीय नागरी सत्कार करण्यात येणार आहे. या सोहळ्यास विधानसभेचे विरोधी पक्षनेते राधाकृष्ण विखे व विधान परिषदेचे विरोधी पक्षनेते धनंजय मुंडे तसेच नगरचे पालकमंत्री प्रा. राम शिंदे, खासदार सदाशिव लोखंडे व दिलीप गांधी, राष्ट्रवादीचे ज्येष्ठ नेते मधुकरराव पिचड, प्रदेशाध्यक्ष सुनील तटकरे, दिलीप वळसे, जयंत पाटील तसेच बाळासाहेब थोरात, शंकरराव कोल्हे, यशवंतराव गडाख, नरेंद्र घुले, डॉ. नागनाथ कोतापल्ले, प्रताप आसबे आदी उपस्थित राहणार असल्याचेही त्यांनी सांगितले.
खासदार शरद पवार यांनी राजकारणासह कृषि, सामाजिक, क्रीडा, साहित्य, सांस्कृतिक, शिक्षण क्षेत्रात अमूल्य योगदान दिले आहे. सर्वसामान्य शेतकऱ्यांचा सात-बारा कोरा करून त्यांना न्याय दिला आहे. तसेच महिलांना ५० टक्के आरक्षण देण्याच्या निर्णयातही त्यांचाच पुढाकार होता. त्यामुळे सरकारने त्यांच्या कार्याची दखल घेऊन त्यांना पद्मविभूषण पुरस्काराने सन्मानित केले असल्याने त्याबद्दल जिल्ह्याच्यावतीने त्यांचा नागरी सत्कार करण्यात येणार असल्याचे घुले म्हणाले. तसेच या निमित्ताने माजी आमदार पांडुरंग अभंग यांच्या ७५ व्या वाढदिवसानिमित्त अमृत महोत्सव सोहळ्याचे आयोजनही पवार यांच्या उपस्थितीत करण्यात आले असून ‘शेतमळा ते विधानसभा’ या त्यांच्या आत्मचरित्राचे प्रकाशनही होणार असल्याचे घुले यांनी सांगितले. यावेळी अशोक बाबर, निर्मला मालपाणी, प्रा. माणिक विधाते, अभिजीत खोसे, सबाजी गायकवाड, अमित खामकर आदी उपस्थित होते.