शिर्डी विमानसेवेला मुहूर्त

ऑक्टोबरमध्ये वाहतूक सुरू होणार, दिवसभरात १२ उड्डाणे

म. टा. प्रतिनिधी, शिर्डी

शिर्डी विमानतळावरून ऑक्टोबरच्या दुसऱ्या आठवड्यात प्रवासी वाहतुकीला प्रारंभ होणार आहे. सकाळी ६ ते संध्याकाळी ६ पर्यंत रोज १२ विमानसेवा असतील. मुंबई, दिल्ली, हैदराबादसाठी ही विमानसेवा असेल. नागरी उड्डाण महासंचालकांनी गुरुवारी शिर्डी विमानतळाचा परवाना मंजूर केला आहे. पुढील आठवड्यात एअर इंडियाची उपकंपनी असलेल्या ‘अलायन्स एअरलाइन्स’तर्फे या विमानतळाची चाचणी घेण्यात येईल. साईभक्तांसाठी ही आनंदाची बातमी आहे.

शिर्डीपासून १३ किमी अंतरावरील काकडी गावाच्या परिसरात २७० कोटी रुपये खर्चून ८७५ एकर जागेवर विमानतळाची उभारणी केली आहे. रनवे, एअर ट्रॅफिक कंट्रोल व्यवस्थाही सज्ज असून, १ लाख लिटर क्षमतेच्या दोन भूमिगत इंधनटाक्यांचेही काम पूर्ण झाले आहे. महाराष्ट्र विमानतळ विकास कंपनीचे उपाध्यक्ष व व्यवस्थापकीय संचालक सुरेश काकाणी म्हणाले की, नागरी उड्डाण महासंचालकांनी शिर्डी विमानतळाचा परवाना मंजूर करून, तो महाराष्ट्र विमानतळ विकास कंपनीच्या स्वाधीन केला आहे. हा परवाना अलायन्स एअरलाइन्सला सुपूर्द झाल्यानंतर पुढील आठवड्यात ४० किंवा ७२ आसनी विमाने उतरवून या विमानतळाची चाचणी घेण्यात येईल. त्यानंतर अंतिम मंजुरी मिळेल.



डिसेंबरनंतर २४ तास सेवा

सुरेश काकाणी म्हणाले, सुरुवातीला शिर्डी विमानतळावरून रोज सकाळी ६ ते संध्याकाळी ६ असे १२ विमानसेवा उपलब्ध असेल. यात मुंबई-शिर्डी, दिल्ली-शिर्डी, हैद्राबाद-शिर्डी आणि भोपाळ-नागपूर-शिर्डी याचा समावेश आहे. सध्या सूर्योदय ते सूर्यास्त या कालावधीतच विमाने ये-जा करतील. नाइट लँडिंगचे काम डिसेंबरपर्यंत संपेल. त्यानंतर २४ तास विमानसेवा सुरु होईल. सध्या रोज ५०० प्रवाशी वाहतूक करण्याचे उद्दिष्ट आहे. राज्य सरकारच्या मालकीचा असलेला हा विमानतळ देशातील पहिले उदाहरण आहे. गोव्याप्रमाणे येथेही खासगी विमाने उतरण्यास परवानगी आहे. देश-विदेशातील उद्योजक, व्यावसायिक तसेच व्हीआयपी व्यक्ती खासगी विमानाने शिर्डीला येऊ शकतील.