साईबाबांचरणी ३२ कोटींच्या २ इमारती अर्पण

मटा ऑनलाइन वृत्त । शिर्डी

शिर्डीच्या साईबाबां चरणी सोने, चांदी आणि लाखो रूपयांसह अनेक मौल्यवान वस्तू अर्पण केल्या जात असल्याचं आपण नेहमीच ऐकतो. पण विरारच्या ओम साईधाम ट्रस्टने शिर्डीजवळ उभारलेल्या साई पालखी निवाऱ्यातील दोन इमारती साईबाबा संस्थानाला देणगी म्हणून अर्पण केल्या आहेत. या दोन इमारतींची किंमत ३२ कोटी रूपयांहून अधिक असून साईबाबांचरणी अर्पण झालेली आजवरचीही आलेली दुसऱ्या क्रमांकांची सर्वात मोठी देणगी असल्याचं मानलं जातं.

पालघरच्या काशिनाथ गोविंद पाटील यांनी त्यांच्या नावावरील एकूण ९७८२.४४ चौरस मीटर बांधीव क्षेत्र असलेल्या साई पालखी निवाऱ्यातील दोन इमारती गुरुवारी साईचरणी अर्पण केल्या. या इमारतींची सरकारी दराप्रमाणे किंमत ३२ कोटी २७ लाख १३ हजार रुपये आहे. या दानपत्रासाठीचे १ कोटी ६३ लाख रुपये इतकं नोंदणी आणि मुद्रांक शुल्क संस्थानने भरलं आहे. डॉ. सुरेश हावरे यांच्या अध्यक्षतेखालील संस्थानाचे व्यवस्थापन मंडळ या इमारतीत राज्यातील गोर-गरीब, आदिवासी, वंचित, दुर्बल विद्यार्थ्यांसाठी आय. ए. एस. अकादमी सुरु करणार आहे. या ओम साईधाम मंदिर ट्रस्टने शिर्डीला येणाऱ्या पदयात्रींसाठी शिर्डीजवळ २००८ मध्ये साईपालखी निवारा उभारला आहे. याठिकाणी पदयात्रींना निवास आणि भोजनाची मोफत सेवा पुरवण्यात येते.