अ‍ॅपशहर

सवयीने केला घात! एकदा पकडले जाऊनही पुन्हा लाच मागितली आणि...

Shrigonda Crime News: आरोपींना मदत करण्याच्या बदल्यात लाच मागितल्याप्रकरणी श्रीगोंदा पोलीस ठाण्यातील पोलीस अंमलदार संजय काळे यांच्याविरुद्ध गुन्हा दाखल करण्यात आला आहे.

Authored byविजयसिंह होलम | महाराष्ट्र टाइम्स.कॉम 23 Mar 2022, 4:55 pm
अहमदनगर: आरोपींची अटक टाळून आरोपींना मदत होईल, असा तपास करण्यासाठी १७ हजार रुपयांची लाच मागितल्याप्रकरणी श्रीगोंदा पोलिस ठाण्यातील पोलिस अंमलदार संजय बबन काळे (वय ३६) याच्याविरुद्ध गुन्हा दाखल करण्यात आला आहे. नगरच्या लाचलुचपत प्रतिबंधक पथकाने ही कारवाई केली. विशेष म्हणजे काळे याला २०१७ मध्ये नगर शहरातील तोफखाना पोलिस ठाण्यात असताना लाच स्वीकारताना पकडण्यात आले होते. तरीही त्याने पुन्हा लाचखोरी केल्याचे आढळून आले. आरोपी काळे याला ताब्यात घेण्यात आले आहे.
महाराष्ट्र टाइम्स.कॉम Shrigonda Police Station
श्रीगोंदा पोलीस ठाणे


वाचा: जळगावात भयंकर अपघात; भरधाव ट्रकने शाळकरी मुलाला चिरडले

श्रीगोंदा तालुक्यातील टाकळी तांदळी येथील एकाने काळे यांच्याविरुद्ध नगरच्या लाचलुचपत प्रतिबंधक पथकाकडे तक्रार दिली होती. तक्रारदाराचे चुलते आणि चुलतभाऊ यांच्या विरुद्ध श्रीगोंदा पोलिस स्टेशनमध्ये गुन्हा दाखल आहे. त्यामध्ये आरोपींना अटक न करण्यासाठी तपासात आरोपींना मदत होईल असा तपास करण्यासाठी अंमलदार काळे याने २० हजार रुपयांची लाच मागितली होती. तक्रारीची पडताळणी करण्यासाठी लाचलुचपत प्रतिबंधक विभागाचे पथक पंचासह १० मार्चला तेथे गेले होते. त्यावेळी आरोपी काळे याने लाचेची मागणी करून ती मिळाल्याशिवाय काम होणार नाही, असे सांगितले होते. २० हजार ऐवजी १७ हजार रुपये स्वीकारण्याची तडजोडही मान्य केली होती. पुढे प्रत्यक्षात लाच स्वीकारताना आरोपी पकडला गेला नाही. मात्र, त्याने केलेली लाचेची मागणी सिद्ध होत असल्याने त्याच्याविरुद्ध लाच मागितल्याचा गुन्हा आता दाखल करण्यात आला असून आरोपीला ताब्यात घेण्यात आले आहे.

वाचा: मुंबईतील व्यक्तीचा मृतदेह श्रीरामपुरातील लॉजमध्ये; नेमकं काय घडलं?

नगरच्या लाचलुचपत प्रतिबंधक विभागाचे पोलिस उपअधीक्षक हरिष खेडकर यांच्या नेतृत्वाखाली शरद गोर्डे, नाईक रमेश चौधरी, विजय गंगुल, वैभव पांढरे, रविंद्र निमसे, बाबासाहेब कराड, हरुन शेख, राहुल डोळसे यांच्या पथकाने ही कारवाई केली. आरोपी संजय काळे याच्याविरुद्ध यापूर्वी २०१७ मध्येही अशी कारवाई झाली आहे. तेव्हा तो नगर शहरातील तोफखाना पोलीस स्टेशनला नेमणुकीला होता. त्याच्याविरुद्ध लाचखोरीची तक्रार आल्यावर लाचलुचपत प्रतिबंधक विभागाच्या पथकाने सापळा रचून त्याला पकडले होते. पाच वर्षांनंतर त्याने पुन्हा असाच गुन्हा केला आहे.
लेखकाबद्दल
विजयसिंह होलम
विजयसिंह होलम, ‘महाराष्ट्र टाइम्स’मध्ये विशेष प्रतिनिधी म्हणून कार्यरत. पत्रकारितेमधील २२ वर्षांचा अनुभव. राजकीय, सामाजिक, गुन्हेगारी विषयक आणि चालू घडामोडींच्या विषयांवर वेळोवेळी विश्लेषणात्मक लिखाण करतात. पत्रकारितेतील अनुभवांसंबंधी पुस्तकाचेही लेखन.... आणखी वाचा

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज