शिवरायांचा अपमान करणाऱ्या छिंदमला झटका

नगरः छत्रपती शिवाजी महाराजांबद्दल अपशब्द वापरल्याच्या गुन्ह्यात माजी नगरसेवक श्रीपाद छिंदमचे वकील आर. एम. कोठारी यांनी सोमवारी आपले वकीलपत्र मागे घेतले आहे.

छत्रपती शिवाजी महाराज यांच्याबद्दल अपशब्द वापरल्याचे गुन्ह्याचे दोषारोपपत्र न्यायालयात काही महिन्यांपूर्वी दाखल करण्यात आले आहे. त्यात छिंदमची बाजू अॅड. कोठारी मांडणार होते. परंतु ही माहिती मिळाल्यानंतर काही जणांनी त्याला सोशल मीडियावरून विरोध सुरू केला. त्यानंतर अॅड. कोठारी यांनी छिंदमचा खटला न लढविण्याचा निर्णय घेतला आहे. नगरच्या मुख्य न्यायदंडाधिकाऱ्यांसमोर या खटल्याची सुनावणी होणार आहे. अद्याप यावर सुनावणी सुरू झाली नसल्याने कोठारी यांनी बाजू मांडलेले नाही. सोमवारी वकीलपत्र मागे घेत असल्याचे कोठारी यांनी स्पष्ट केले. छिंदम याचे वकीलपत्र न घेण्याचा ठराव नगरच्या बार असोसिएशनने यापूर्वीच केला आहे.