'साहेब गद्दारांना क्षमा नाही, आय सपोर्ट उद्धव ठाकरे'; बॅनरबाजीमुळे काँग्रेस नेता चर्चेत

शिर्डी / श्रीरामपूर : श्रीरामपूर शहरात काँग्रेसचे माजी नगरसेवक तथा विद्यमान शहराध्यक्ष संजय छल्लारे यांनी उद्धव ठाकरे यांच्या समर्थनार्थ ही बॅनरबाजी केली आहे. श्रीरामपूर नगरपरिषद कार्यालयाजवळ हे बॅनर लावण्यात आले. या बॅनरवर 'साहेब गद्दारांना क्षमा नाही, आय सपोर्ट उद्धव ठाकरे' आशा आशयाचा मजकूर लिहिलेला आहे. भगव्या रंगाच्या या बॅनरवर शिवसेना प्रमुख दिवंगत बाळासाहेब ठाकरे, काँग्रेसचे माजी आमदार दिवंगत जयंत ससाणे तसेच शिवसेना पक्षप्रमुख उद्धव ठाकरे यांच्यासह शहराध्यक्ष संजय संजय छल्लारे यांनी गळ्यात भगवे उपरणे घातलेला फोटो या बॅनरवर लावण्यात आला आहे. तसेच छल्लारे आणि काँग्रेस कार्यकर्त्यांनी हे बॅनर सोशल मीडियावर देखील व्हायरल केले आहेत.

काँग्रेस, राष्ट्रवादीसोबत आता घरोबा नको तर नैसर्गिक मित्र असलेल्या भाजपसोबत सत्ता स्थापन करावी अशी अट घालत एकनाथ शिंदे यांनी बंडाचे हत्यार उपसले आहे. कडवट शिवसैनिक अशी ओळख असणारे राज्याचे नगरविकास मंत्री एकनाथ शिंदें यांच्यासह सेनेच्या ४० पेक्षा अधिक आमदारांनी बंड पुकारत आधी सुरत आणि नंतर थेट गुवाहाटी गाठली आहे. या सगळ्या राजकीय घडामोडींमुळे राज्य सरकार अस्थिर झाले आहे. ठाकरे सरकारचे काय होणार याकडे राज्याचे लक्ष लागले आहे. अशातच या बंडखोर आमदारांविरोधात शिवसेनेकडून ठिकठिकाणी निदर्शने तसेच आक्रमक आंदोलनं केली जात आहेत. मात्र आता शिवसेनेसोबत राष्ट्रवादी आणि काँग्रेस कार्यकर्ते देखील उद्धव ठाकरे यांना पाठींबा देण्यासाठी पुढे येत असल्याचं बघायला मिळतंय. सोशल मीडियावर तर भाजप कार्यकर्ते बंडखोर आमदारांसह एकनाथ शिंदे यांच्या समर्थनार्थ पोस्ट करत आहेत. तर आता काँग्रेस-राष्ट्रवादीचे कार्यकर्ते उद्धव ठाकरे यांच्या समर्थनार्थ उतरले आहेत.

शिवसेनेतील खदखद खालच्या स्तरापर्यंत, नगरसेवकाचे संपर्कप्रमुखावर गंभीर आरोप

श्रीरामपूर शहरात काँग्रेस पदाधिकाऱ्यांनी उद्धव ठाकरे यांच्या समर्थानात बॅनरबाजी केल्याचे बघायला मिळते आहे. बंडखोर आमदारांना काँग्रेस-राष्ट्रवादी नको होती तर अडीच वर्षांपूर्वीच विरोध का केला नाही? असा सवाल काँग्रेसचे शहराध्यक्ष संजय छल्लारे यांनी उपस्थित केला आहे. सामान्य जनता उद्धव ठाकरेंसोबत असल्याचे त्यांनी म्हटले आहे. एकीकडे बहुतांश शिवसेना आमदार बंडखोर असल्याने शिवसेनेत उभी फुट पडलेली असताना कॉंग्रेस पदाधिकारी थेट उद्धव ठाकरे यांच्या समर्थनार्थ उतरल्याने अहमदनगर जिल्ह्यात या बॅनरची चर्चा होत आहे.

'यावर्षी योग्य माणसाच्या हस्तेच विठ्ठलाची पूजा'; भाजप खासदाराचे सूचक वक्तव्य