‘हिवरे बाजारसारखी गुणवत्ता असावी’

म. टा. वृत्तसेवा, नगर

हिवरे बाजार येथील जिल्हा परिषद प्राथमिक शाळेसारख्या शाळा खोल्या राज्यातील सर्वच शाळांमध्ये असाव्यात. येथील हिवरे बाजारसारखा शैक्षणिक दर्जा व भौतिक सुविधा इतर शाळांमध्येही निर्माण झाल्या तर भविष्यात देशासाठी जबाबदार नागरिक बनतील, असा विश्वास राज्याचे पाणीपुरवठा व स्वच्छता विभागाचे मुख्य अपर सचिव श्याम गोयल यांनी व्यक्त केला.

गोयल यांनी हिवरे बाजार प्राथमिक शाळेला भेट देऊन शालेय उपक्रमांची माहिती घेतली. त्या वेळी ते बोलत होते. जिल्हा परिषदेचे मुख्य कार्यकारी अधिकारी विश्वजीत माने, उपमुख्य कार्यकारी अधिकारी उज्ज्वला बावके, वरिष्ठ भूवैज्ञानिक ऋषिराज गोसकी, कक्ष अधिकारी सुभाष कराळे यांच्यासह अधिकारी उपस्थित होते.

हिवरे बाजार प्राथमिक शाळेची डिजिटल क्लासरुम, विद्यार्थ्यांनी स्वतः कृती करून फलकावर सोडवलेली गणिती क्रिया, भाषिक कौशल्ये पाहून त्यांनी शाळेचे कौतुक केले. शाळेतील विद्यार्थ्यांनी स्वरचित कविता गोयल यांना ऐकविल्या. विद्यार्थ्यांनी गोयल यांचा सत्कार केला. गोयल यांच्यासह अधिकारी वर्गाने विद्यार्थ्यांशी संवाद साधला. शालेय परिसरातील स्वच्छतेचीही पाहणी केली.