म. टा. प्रतिनिधी, नगर
केडगाव दुहेरी हत्याकांडानंतर पोलिस अधीक्षक कार्यालय तोडफोडप्रकरणी माजी जिल्हा परिषद सदस्य सचिन अरुण जगताप, नगरसेवक विपुल शेटिया यांच्यासह सहाजण पोलिसांसमोर हजर झाले. या सर्वांना अटक करून न्यायालयात हजर केले असता त्यांची जामिनावर सुटका झाली आहे.
केडगाव दुहेरी हत्याकांडानंतर राष्ट्रवादी काँग्रेसचे आमदार संग्राम जगताप यांना पोलिसांनी चौकशीसाठी पोलिस अधीक्षक कार्यालयात आणले होते. त्यावेळी त्यांच्या समर्थकांनी पोलिस अधीक्षक कार्यालयाची तोडफोड केली होती. याप्रकरणी भिंगार पोलिस स्टेशनला गुन्हा नोंदविण्यात आला होता. या गुन्ह्यात यापूर्वी ८९ जणांना अटक केली होती. हे सर्वजण जामिनावर सुटले आहेत. या गुन्ह्यातील माजी जिल्हा परिषद सदस्य सचिन जगताप, नगरसेवक विपूल शेटिया, भुपेंद्र परदेशी, अंकुश चत्तर, अॅड. विक्रम भाऊसाहेब शिंदे, विशाल सुर्यवंशी हे भिंगार पोलिस स्टेशनला हजर झाले. या गुन्ह्याचे तपासी अधिकारी कैलास देशमाने यांनी या सर्वांना अटक करून प्रथमवर्ग न्यायदंडाधिकारी एस. बी. पाटील यांच्यासमोर हजर केले. या सर्वांना न्यायालयीन कोठडी सुनावण्यात आल्यानंतर जामिन अर्जावर सुनावणी होऊन सर्वांना जामिन मंजूर करण्यात आला. प्रत्येकी २५ हजार रुपयांच्या जातमुचक्यावर जामिन मंजूर झाला असून, आठवड्याच्या प्रत्येक गुरुवारी सर्वांनी भिंगार पोलिस स्टेशनला हजेरी देण्याची अट न्यायालयीने घातली आहे.