मानवी हक्क दिनानिमित्त
जनजागृती उपक्रम
नगर : मानवी हक्क दिनानिमित्त जिल्हा प्रशासन, जिल्हा विधी सेवा प्राधीकरण, पोलिस प्रशासन आणि जिल्हा परिषदेच्या वतीने मंगळवारी जिल्ह्यात विविध उपक्रमांचे आयोजन करण्यात आले आहे. मानवी हक्कांविषयी नागरिकांना माहिती व्हावी, मानवी हक्कांची जपणूक, मानवी हक्क आयोगाची कार्ये याबाबत माहिती देण्यात येणार आहे. तसेच जनजागृती रॅली काढण्यात येणार आहे. मानवी हक्क दिन नियोजनाबाबत जिल्हाधिकारी कार्यालयात बैठक घेण्यात आली. या वेळी मनपा उपायुक्त सुनील पवार, समाजकल्याण विभागाचे सहायक आयुक्त पांडुरंग वाबळे, शिक्षणाधिकारी रमाकांत काठमोरे, जिल्हा विधि सेवा प्राधिकरणाचे एन. व्ही. देशमुख आदी उपस्थित होते. मंगळवारी (१० डिसेंबर) सकाळी ८ वाजता जिल्हा परिषदेचा शिक्षण विभाग आणि महापालिका यांच्या वतीने मानवी हक्क जागरुकता रॅली काढण्यात येणार आहे. सकाळी १० वाजता न्यू आर्ट्स महाविद्यालयात जिल्हा विधी सेवा प्राधिकरणाच्या वतीने प्रबोधन व्याख्यान आयोजित करण्यात आले आहे. त्याचबरोबर, प्रत्येक तालुकास्तरावर तालुका विधी सेवा प्राधिकरण, शिक्षण विभाग आणि पोलिस दलाच्या वतीने मानवी हक्कांबाबतची माहिती कार्यक्रमांच्या माध्यमातून दिली जाणार आहे.
ध्वजदिन निधी संकलन
नगर : येथील जिल्हा सैनिक कल्याण कार्यालयाच्या वतीने ध्वजदिन निधी संकलनाचा शुभारंभ शुक्रवारी (१३ डिसेंबर) होणार आहे. महासैनिक संकुल येथे सकाळी ११ वाजता हा उपक्रम होणार आहे. या वेळी जिल्हाधिकारी राहुल द्विवेदी, जिल्हा परिषदेचे सीईओ शिवराज पाटील, पोलिस अधीक्षक सागर पाटील, कर्नल जीवन झेंडे, कर्नल अविन उथ्थैया आदी उपस्थित राहणार आहेत. या कार्यक्रमास उपस्थित राहण्याचे आवाहन निवासी उपजिल्हाधिकारी प्रशांत पाटील आणि जिल्हा सैनिक कल्याण अधिकारी मेजर प्रांजळ जाधव (निवृत्त) यांनी केले आहे.
--