व्हॉट्सअॅपद्वारे समाजकारण

म. टा. प्रतिनिधी, नगर

व्हॉट्सअॅपसह अन्य सोशल मीडियातून चांगले ते घेऊन प्रभावी समाजकारण करण्याची किमया नगरमधील काही ‘आयटीयन्स’नी साधली आहे.

नगरच्या न्यू आर्ट्स कॉलेजमध्ये २००१ ते २००३ या काळात बीसीएस व एमसीएस अभ्यासक्रमास असलेल्या विद्यार्थ्यांना येथील अतुल मेहेर व तुषार देशमुख या माजी विद्यार्थ्यांनी १५ वर्षांनी एकत्र जमवले. त्या वेळी त्यांच्यासमवेत असलेल्या मुला-मुलींपैकी बहुतेक विवाहबद्ध होऊन आयटीसह विविध क्षेत्रांत कार्यरत आहेत. ६०-६५ जणांचा व्हॉट्सअॅप ग्रुपही यानिमित्ताने निर्माण झाला. यातून समाजकार्यात ही मंडळी सक्रिय झाली. आयटी क्षेत्रातील नोकरीसह स्वतःच्या छोट्या-मोठ्या उद्योगातील व्यस्तपणातून वेळ काढून या मंडळींनी आत्महत्याग्रस्त शेतकरी कुटुंबांना मदतीचा हात देणाऱ्या अभिनेते नाना पाटेकर व मकरंद अनासपुरे यांच्या नाम संस्थेला स्वतःचा १ लाख ३० हजाराचा निधी संकलित करून दिला. दुष्काळाच्या पार्श्वभूमीवर, मच्छिंद्रनाथांच्या मायंब्यात ४५० वृक्षांचे रोपण व तेथील डोंगर परिसरात साडेचार हजारावर बियांची पखरण केली आहे. ही झाडे पावसामुळे बहरली असून, डोंगरात काही बिया रुजल्याही आहेत.

मेहेर व देशमुख या नगरमधील दोन आयटीयन्ससह उद्धवराज टेमकर, मंजूषा दिवसे, अबोली जोशी-पोतनीस, महेश शिंदे, विशाल पांचारिया, प्रिया उंबरहंडे, रमाकांत साठे, सचिन गुंड, विद्या गुंड, शुभांगी कुलकर्णी, वैशाली भांड, सुजय काळे, संदीप ठोंबरे व अन्य आयटीयन्स सदस्यांच्या व्हॉटसअॅप ग्रुपच्या माध्यमातून सुरू असलेले विविध सामाजिक काम कौतुकास्पद ठरले आहे. आयटीसारख्या झगमगाटी व उच्च क्षेत्रात सारे कार्यरत असले तरी यातील ७० टक्के मंडळींचे मूळ ग्रामीण भागाचे आहे. त्यामुळे आपल्या गावाविषयी, मातीविषयी, कॉलेजविषयी ममत्व सर्वांमध्ये आहे. यातूनच आता आणखी शक्य ते समाजकार्य करण्याचे या मंडळींचे स्वप्न आहे. ज्या न्यू आर्ट्स कॉलेजमध्ये शिक्षण घेऊन करिअर घडवले, त्या कॉलेजचे ऋण फेडण्यासाठी या कॉलेजच्या बीसीएस व एमसीएस डिपार्टमेंटच्या लायब्ररीला या माजी विद्यार्थ्यांनी नवी व बदलत्या तंत्रज्ञानाची माहिती देणारी पुस्तके भेट दिली आहेत. येथे शिकणाऱ्या विद्यार्थ्यांमध्ये सॉफ्ट स्किल्स रुजावीत, तसेच बाहेरच्या जगात प्रत्यक्ष काम करताना येणारे अनुभव समजावेत, यासाठी काही जण गेस्ट लेक्चरर म्हणून येथे मोफत मार्गदर्शन करणार आहेत. याशिवाय ग्रामीण भागातील मुलांमध्ये शिक्षण घेताना आत्मविश्वासही रुजावा म्हणून शाळांच्या ग्रंथालयांना पुस्तके, शालेय किट व अन्य आवश्यक मदतही देण्याचा विचार सुरू आहे. यासाठी व्हॉट्सअॅप व कॉन्फरन्स कॉलिंगद्वारे नियमित संवाद व चर्चा झडते. परदेशात असलेले माजी विद्यार्थी जास्त आर्थिक मदतीचा सहभाग देतात, तर देशातील व राज्यातील माजी विद्यार्थी आर्थिक सहभागासह सामाजिक कामासाठी आवश्यक असलेला प्रत्यक्ष वेळही देतात.