अनोख्या मैफलीने 'सावली'ला ७० हजारांची मदत
नगर : एकीकडे महिला व युवती हातावर मेंदी रंगवत असताना दुसरीकडे 'दिदी तेरा देवर दिवाना'... 'मेहंदी लगा के रखना'...'ओ मेरी जान'..'चोरीचा मामला'...'झाल्या तिन्ही सांजा'...अशा अनेकविध हिंदी-मराठी गीतांच्या रंगलेल्या मैफलीत नगरकर मंत्रमुग्ध झाले. या मैफलीने येथील सावली या सामाजिक संस्थेला तब्बल ७० हजारांची आर्थिक मदत मिळवून दिली.
पुणे येथील मृगनयनी मेंदी आर्ट्सच्या धनश्री हेंद्रे व गोल्डन मेलडीचे संजय माळवदे यांच्या पुढाकाराने येथील माउली सभागृहात मेंदीसमवेत गाण्यांची मैफल झाली. भूषणनगर-केडगावमधील सावली संस्थेतील निराधार मुलांच्या मदतीसाठी ही मैफल झाली. यात एकीकडे हेंद्रे यांच्यासह संजीवनी कदम, तेजल वांजळे, प्रियांका तावरे, तेजल गोरे, अनिता अधिकारी, सोनाली जाधव व मनीषा वांजळे यांनी तीन तासांत २५० वर महिलांच्या हातावर मेंदी काढली. तर दुसरीकडे माळवदे यांच्यासह त्यांच्या सहकारी कलावंतांनी हिंदी-मराठी गाण्यांच्या सादरीकरणातून रसिकांना मंत्रमुग्ध केले. या उपक्रमातून जमा झालेले देणगीरूपी ७० हजार रुपये सावली संस्थेचे नितेश बनसोडे यांच्याकडे सुपूर्द करण्यात आले.
या वेळी सुरेश लोळगे, गणेश उंडाळे, योगेश मैड, रोहित हारके, गोकुळ वडे, प्रमोद रामदिन, अॅड. अमिन धाराणी, प्रशांत बंडगर, सुरेश आघाव, विजयमाला माने उपस्थित होते. नगरमध्ये अनाथ मुलांच्या मदतीसाठी केलेला मेंदी-गाणी मैफल उपक्रम मनाला भावणारा असून, आपल्या कलेच्या माध्यमातून त्यांना झालेली मदत आत्मसमाधान देणारी आहे, अशी भावना या वेळी हेंद्रे यांनी व्यक्त केली. तर, गाण्याच्या आवडीचा उपयोग सामाजिक संस्थेसाठी झाल्याचा विशेष आनंद असल्याची भावना माळवदे यांनी व्यक्त केली.
--