क्रीडा शिक्षकांनी घेतली हजारेंची भेट

म. टा. प्रतिनिधी, नगर
राज्य सरकारने शाळांतील कला क्रीडा विषयांच्या तासिका कमी केल्या आहेत. या तासिका पूर्ववत करण्यासाठी राज्याचे शिक्षणमंत्री व मुख्यमंत्र्यांशी चर्चा करणार असल्याचे आश्वासन ज्येष्ठ समाजसेवक अण्णा हजारे यांनी शिक्षकांना दिले. राज्य क्रीडा शिक्षक महासंघाच्या पदाधिकाऱ्यांच्या शिष्टमंडळाने हजारे यांची भेट घेतली.
शाळेतील कला व क्रीडा विषयांच्या तासिका कमी करुन शिक्षण व्यवस्था मोडीत काढण्याचा प्रयत्न सरकारकडू होत आहे. या निर्णयामुळे राज्यभरातील जवळपास १५ हजार शिक्षक अतिरिक्त होणार आहेत. याबाबत राज्य सरकारचे लक्ष वेधण्यासाठी मोर्चे, आंदोलने झाली असली तरी त्याचा काहीही उपयोग झाला नसल्याने शिक्षकांनी स्पर्धांवर बहिष्कार टाकण्याचा निर्णय घेतल्याचे पदाधिकाऱ्यांनी सांगितले. त्यावर हजारे यांनी याबाबत मुख्यमंत्री व शिक्षणमंत्र्यांशी चर्चा करण्याचे आश्वासन शिक्षकांना दिले. या वेळी महासंघाचे अध्यक्ष राजेंद्र कोतकर, संजय पठाडे, सोमनाथ वाकचौरे, दादासाहेब दुसुंगे, शिरीष टेकाडे, बापू होळकर, महेंद्र हिंगे, दत्तात्रय औटी, भाऊ धावडे, विजय जाधव, शिवाजी धामणे, विनायक उंडे, रमाकांत दरेकर, हरिश्चंद्र ढगे, श्रीकांत जगदाळे, बाबासाहेब म्हस्के, बापू जगताप, बाळू बोडखे, त्रिंबक साळुंके आदींसह शिक्षक मोठ्या संख्येने उपस्थित होते.