एसटी करणार योजनांचे मार्केटिंग

म. टा. प्रतिनिधी, नगर

एसटी महामंडळ प्रवाशांसाठीच्या विविध योजना तसेच महामंडळाकडून राबवले जाणाऱ्या उपक्रमांची माहिती प्रवाशांना होण्यासाठी नगर जिल्ह्यातील प्रत्येक आगारात कर्मचाऱ्यांकडून मार्केटिंग केले जाणार आहे. या कामासाठी विभागातीलच काही अधिकाऱ्यांची नियुक्ती करण्यात आली असून त्यांच्याकडून योजनांचा प्रचार प्रसार केला जाणार असल्याची माहिती आहे.

सार्वजनिक वाहतूक व्यवस्थेत महत्वाच्या समजल्या जाणाऱ्या एसटीची प्रवासी संख्या सध्या झपाट्याने कमी होत आहे. एसटीच्या तुलनेत प्रवासी खासगी वाहतुकीस प्राधान्य देत असून याचा एसटीच्या उत्पन्नावर विपरीत परिणाम झाला आहे. उत्पन्न कमी होत असल्याने दैनंदीन खर्चाचा मेळ बसविण्यात अडचणी येत आहेत. अशा स्थितीत प्रवासी एसटीकडे वळत नसल्याच्या कारणांचा शोध घेण्यात येऊन त्यानुसार कार्यवाही करण्याचा अधिकाऱ्यांचा प्रयत्न आहे. महामंडळाकडून प्रवाशांच्या सेवेसाठी अनेक योजना राबविल्या जात आहेत. जिल्ह्यातील मोठ्या बसस्टँडवर हे अधिकारी कर्मचारी उपस्थित राहून प्रवाशांना माहिती देणार असल्याचे विभाग नियंत्रक अशोक जाधव यांनी सांगितले.