‘वैद्यकीय संशोधनाला हवे प्रोत्साहन’

म. टा. प्रतिनिधी, नगर

‘संशोधनाच्या दृष्टीकोनातून वैद्यकीय क्षेत्राचा विचार केला, तर आजही या क्षेत्रात फारच कमी संशोधन दिसते. मुळात आपल्याकडे संशोधन करण्यासाठी मोठ्या प्रमाणात डाटा उपलब्ध होत असला तरी संशोधन करण्याचे प्रमाण वाढत नाही. परंतु वैद्यकीय क्षेत्रामध्ये अजून प्रगती होण्यासाठी या क्षेत्राला फायदा होण्यासाठी संशोधनाला प्रोत्साहन देण्याची गरज आहे,’ असे मत नाशिक येथील महाराष्ट्र आरोग्य विद्यापीठाचे कुलगुरु डॉ. दिलीप म्हैसेकर यांनी व्यक्त केले.

सहकार महर्षी पद्मश्री डॉ. विठ्ठलराव विखे पाटील यांच्या जयंतीनिमित्त आयोजित करण्यात आलेल्या एका कार्यक्रमाला म्हैसेकर हे नगरमध्ये आले होते. यावेळी त्यांनी पत्रकारांशी संवाद साधला. ते म्हणाले की, ‘एका सर्वेक्षणानुसार १ हजार ६ लोकसंख्येमागे एक डॉक्टर असण्याची गरज आहे. परंतु आपल्याकडे हे प्रमाण १ हजार ८६४ मागे एक असे आहे. डॉक्टर व लोकसंख्या यांचे प्रमाण योग्य येण्यासाठी अद्यापही दहा वर्षाचा कालावधी लागेल. आजही वैद्यकीय महाविद्यालयांची संख्या कमी असून याबाबत एक आराखडा तयार करण्यात आला आहे. त्यानुसार डिसेंबर पर्यंत कोणत्या विभागात किती वैद्यकीय महाविद्यालयांची आवश्यकता आहे, हे स्पष्ट होईल.’

सरकारी आरोग्य सेवाबाबत बोलताना म्हैसेकर यांनी सांगितले की,‘सरकारी रुग्णालयांमध्ये डॉक्टर काम करण्यास उत्सुक नसतात. त्यामुळे ग्रामीण भागात तज्ज्ञ डॉक्टरांचा अभाव जाणवत असून हे प्रमाण वाढवण्यासाठी फिलोशिप सारख्या योजना असाव्यात.

आज वैद्यकीय सेवा घेताना सरकारी योजनांचा नागरिकांना नक्कीच फायदा होतो. परंतु रुग्णांचा वाढणारा ओढा जास्त असल्याने अजूनही विविध सरकारी योजना लागू करणे आवश्यक आहे. नेत्रदान, अवयवदान, रक्तदान यासाठी नागरिकांनी पुढाकार घ्यावा,’ असे आवाहनही त्यांनी केले.

समुपदेशन गरजेचे

‘बऱ्याचवेळा कामाचा जास्त ताण आल्यामुळे डॉक्टर चिडतात. त्यामधून वादावादीचे प्रकार होऊ शकतात. परंतु प्रत्येक रुग्णाची व्यवस्थित तपासणी करणे हे डॉक्टरांचे कर्तव्य आहे. मेडिकलच्या विद्यार्थ्यांना याची जाण व्हावी,यासाठी शिक्षण घेत असताना विद्यार्थ्यांचे समुपदेशन होणे गरजेचे आहे,’ असेही कुलगुरु डॉ. दिलीप म्हैसेकर यांनी सांगितले.