म. टा. वृत्तसेवा, कर्जत
वृद्ध भुमिहीन संघटनेच्या वतीने विविध मागण्यांसाठी कर्जत येथे बुधवारी (१९ सप्टेंबर) रस्ता रोको आंदोलन करण्यात आले.
ज्येष्ठ नागरिकांचे धोरण, ज्येष्ठ नागरिकांना अद्यापही न मिळणाऱ्या शासकीय सवलती, जेष्ठ नागरिक धोरण २०१३ची अंमलबजावणी, यासह पंतप्रधान आवास योजनेतील बेघरांना घरे मिळवीत, भारत गॅसचे मंजूर असलेले कनेक्शन त्वरित मिळावे, अशा विविध मागण्यांसाठी महाराष्ट्र ज्येष्ठ नागरिक महासंघ नाशिक व नगर यांच्या वतीने कर्जत येथील वृद्ध भूमिहीन महिला संघटनेच्या वतीने मंगळवारी कर्जत येथे रास्ता रोको आंदोलन करण्यात आले. यानंतर आंदोलक मोर्चाने तहसील कार्यालयावर गेले. तेथे या मोर्चाचे सभेत रुपांतर झाले. या वेळी तहसीलदार किरण पाटील यांना मागण्यांचे निवेदन देण्यात आले. या मागण्यां संदर्भात योग्य कार्यवाही करण्याचे आश्वासन तहसीलदार पाटील यांनी दिले. यानंतर सदर आंदोलन स्थगित करण्यात आले. यावेळी संघटनेचे अध्यक्ष शब्बीर पठाण, भारिपचे सोमनाथ भैलुमे, सय्यदभाई काटेमापवाले, हरिश्चंद्र काळे, गोदड समुद्र, किसन शिंदे, शोभा पवार, आशा काळे, सरस्वती घोडके, सविता सुद्रिक, रंजना राउत, जावेद काझी, हनीफ शेख आदी उपस्थित होते.
यावेळी पंतप्रधान आवास योजनेतील बेघरांना घरे मिळवीत, भारत गॅसचे मंजूर असलेले व ऑनलाइन मोफत गॅस कनेक्शन देणे बंधनकारक असताना विलंब केला जात आहे. ते त्वरित मिळावे व रिफील बुकिंग झाल्यानंतर सविस्तर रिफील बुकिंगसाठी पैसे भरल्याची नियमित पावती द्यावी, अशीही मागणा करण्यात आली आहे. दादासाहेब गायकवाड योजनेतील भूमिहीनांना जमीन मिळावी, संजय गांधी योजनेतील मानधन मर्यादा नियमानुसार वाढविण्यात यावी यासह विविध मागण्या यावेळी आंदोलकांनी केल्या. तहसीलदारांनी आंदोलकांच्या मागण्यांनुसार संबंधित विभागाला अवगत करून खुलासा मागण्यात येईल. यातील दोषींवर कारवाई करण्यात येईल. मात्र, वैयक्तिक लाभाची प्रकरणे नियमानुसार आणावीत, ती आगामी बैठकीत त्वरित मंजूर करण्यात येतील, असे आश्वासन यावेळी देण्यात आले. सामाजिक कार्यकर्ते पोपट कांबळे यांनी आभार मानले.