वाहतूक नियम मोडून ऊस नेणारे 'टार्गेट'वर

म. टा. प्रतिनिधी, नगर

ऊस वाहतूक करताना गाडीला रिफ्लेक्टिव टेप लावले नसल्यास अशा वाहनचालकांना कारवाईला सामोरे जावे लागणार आहे. ऊस वाहतूक करणाऱ्या वाहनांमुळे होणारे अपघात टाळण्यासाठी रिफ्लेक्टिव टेप लावण्याच्या सूचना देण्यात आल्या असून त्याकडे दुर्लक्ष करणाऱ्यांवर कारवाई करण्याचा निर्णय सोमवारी जिल्हाधिकारी कार्यालयात झालेल्या जिल्हा ग्राहक संरक्षण परिषदेच्या बैठकीमध्ये घेण्यात आला.

जिल्ह्यातील साखर कारखान्यांचे सध्या ऊसगाळप हंगाम सुरू असून मोठ्या प्रमाणात ऊस वाहतूक ट्रॅक्टर, बैलगाडीद्वारे केली जाते. जिल्ह्यात विविध मार्गावर ऊस वाहतूक करणारे ट्रॅक्टर दिसून येतात. या वाहनांमुळे होणारे अपघात टाळण्यासाठी रिफ्लेक्टिव टेप लावण्याच्या सूचना जिल्हा प्रशासनाने मागील बैठकीत दिल्या होत्या. मात्र, अद्यापही अशी वाहतूक सुरू असल्यास संबंधित वाहनांवर कडक कारवाई करण्यात यावी, असा निर्णय बैठकीत घेण्यात आला आहे. जिल्हाधिकारी अभय महाजन यांनी उपप्रादेशिक परिवहन विभागाला त्याबाबत आदेश दिला आहे.

जिल्ह्यातील वीज, रस्ते, अन्नधान्य भेसळ आणि धोकादायक वाहतूकीबाबत जिल्हा ग्राहक संरक्षण परिषदेच्या सदस्यांनी बैठकीत मते मांडली. जिल्ह्यातील नागरिकांना भेडसावणाऱ्या विविध प्रश्नांवर या वेळी सकारात्मक चर्चा झाली. यावेळी सदस्यांनी उपस्थित केलेल्या मुद्द्यांबाबत निश्चितपणे विचार करून कार्यवाही केली जाईल, असे जिल्हाधिकाऱ्यांनी स्पष्ट केले. तसेच जिल्ह्यात एक सकारात्मक वातावरण करण्यासाठी ग्राहक परिषदेने पुढाकार घ्यावा. सरकारी योजनांची चांगली अंमलबजावणी करण्यासाठी आणि वीज, पाणी यांच्या वापर जपून करण्यासंदर्भात जनजागृती करण्यासाठी पुढाकार घेण्याचे आवाहनही केले. बैठकीला जिल्हा पुरवठा अधिकारी संदीप निचीत, कारभारी गरड, अरुण कुलथ, जालिंदर वाघचौरे, उमा मेहेत्रे, अशोक गायकवाड, शिरीष बापट, गोरख बारहाते, सुनीलकुमार रुणवाल, उषा नलवडे, प्रा. अमिता कोहली, अशोक शेवाळे, डॉ. रजनीकांत पुंड यांच्यासह परिषदेच्या सदस्यांची उपस्थित होती.