बठेजा आत्महत्या; दोघांविरुद्ध गुन्हा

नगर : उद्योजक बलराज आत्माराम बठेजा यांना आत्महत्येस प्रवृत्त केल्याप्रकरणी पोलिसांनी पवन वाळके व त्याचा भाऊ (पूर्ण नाव पोलिसांकडे नाही) या दोघांवर गुन्हा दाखल केला आहे.
उद्योजक बलराज बठेजा यांनी १७ डिसेंबर २०१७ रोजी गुलमोहोर रोडवरील पारिजात चौकामध्ये असलेल्या इमारतीवरून उडी मारून आत्महत्या केली होती. या आत्महत्येचे गुढ उकलण्यात पोलिसांना यश आले असून शुक्रवारी तोफखाना पोलिस स्टेशनला पवन वाळके व त्याच्या भावाच्या विरोधात आत्महत्येस प्रवृत्त केल्याचा गुन्हा सहायक पोलिस निरीक्षक संजयकुमार सोनी यांच्या फिर्यादीवरून नोंदवण्यात आला आहे.
बठेजा यांनी त्यांच्या शितल इंडस्ट्रीज या फर्मच्या मोकळ्या जागेत बांधण्यात आलेले शेड पवन वाळके व त्याच्या चेकवर सही करणारा भाऊ यांना भाडोत्री दिले होते.
याबाबतचा १७ डिसेंबर रोजी करार करण्यात येणार होता. पण हा करार रद्द करण्यावरून पवन वाळके व त्याच्या भावाने उद्योजक बठेजा यांचा मानसिक त्रास दिला. त्यामुळे बठेजा यांनी शितल इंडस्ट्रीजच्या लेटरपॅडवर चिठ्ठी लिहून आत्महत्या केली होती. या चिठ्ठीच्या आधारे तपास करून पवन वाळके व त्याच्या भावाच्या विरोधात आत्महत्येस प्रवृत्त केल्याचा गुन्हा नोंदवण्यात आला आहे.