गुंतवणूकदारांना पाठिंबा

म. टा. प्रतिनिधी, नगर
पॅनकार्ड क्लब कंपनीत आर्थिक गुंतवणूक केलेल्यांच्या पाठीशी उभे राहण्याचा निर्णय राष्ट्रीयीकृत बँक कर्मचारी संघटनेने घेतला आहे. येथे नुकत्याच झालेल्या पॅनकार्ड क्लब गुंतवणूकदारांच्या मेळाव्यास बँक कर्मचारी संघटनेचे ज्येष्ठ नेते विश्वास उटगी यांनी उपस्थित राहून गुंतवणूकदारांचे पैसे परत मिळण्यासाठी लढा देण्याचा निर्धार व्यक्त केला. पॅनकार्ड क्लब कंपनीच्या गुंतवणूकदारांचे पैसे परत करण्यासाठी 'सेबी'कडून दिरंगाई होत असल्याने गुंतवणूकदारांनी आपले अर्ज भरून द्यावेत तसेच 'सेबी'च्या मुख्य कार्यालयावर नेण्यात येणाऱ्या मोर्चात सहभागी व्हावे, असे आवाहनही त्यांनी केले.
येथील सप्तपदी मंगल कार्यालयात (काटवन खंडोबा रोड) पॅनकार्ड क्लब गुंतवणुकदारांची नुकतीच बैठक झाली. यावेळी उटगी यांच्यासह मुंबईचे निवृत्त सहाय्यक पोलिस आयुक्त अशोक गोरे, अध्यक्ष अरविंद पेडणेकर, राजू देसले, सरचिटणीस विशाल बर्डे, खजिनदार विजय गोसावी,
नगरचे प्रतिनिधी मोहन आकुबत्तीन, लक्ष्मण गुरप, संतोष सोनटक्के, राजेश आकुबत्तीन आदींसह जिल्ह्यातील गुंतवणूकदार उपस्थित होते.
यावेळी बर्डे यांनी पॅनकार्ड क्लब लिमिटेड कंपनीबाबतची माहिती दिली. 'देशभरातून लाखो गुंतवणुकदारांनी आपली गुंतवणूक या कंपनीत केली आहे. 'सेबी'ने पॅनकार्ड क्लबला नोटीस पाठवून व गुंतवणूक घेण्यास प्रतिबंध करून गुंतवणुकीची रक्कम गुंतवणूकदारांना परत करण्यास सांगितले होते. मात्र, रक्कम अद्याप परत करण्यात आली नाही. न्यायालयाने 'सेबी'ला मालमत्ता विक्री
करून गुंतवणूकदारांचे पैसे देण्याचे आदेश दिले आहेत. मात्र, 'सेबी'कडून कंपनीच्या मालमत्तेचा अजूनही लिलाव करण्यात आला नसून, गुंतवणुकदारांचे पैसे परत करण्यासाठी दिरंगाई केली जात आहे. देशात जवळपास ५१ लाख व महाराष्ट्रात २७ लाख गुंतवणूकदार आहेत', असे त्यांनी सांगितले. अध्यक्ष अरविंद पेडणेकर यांनी, गुंतवणुकदारांच्या दाव्यांसह निवेदन रॅली लवकरच 'सेबी'च्या मुंबई कार्यालयावर काढण्यात येणार असल्याचे सांगितले व गुंतवणूकदारांनी यात सहभागी होण्याचे आवाहन केले. आकुबत्तीन यांनीही यावेळी जिल्ह्यातील गुंतवणूकदारांची माहिती दिली.