शेतकऱ्यांना उद्यापर्यंत शेवटची मुदत
म. टा. प्रतिनिधी, नगर
केंद्र सरकारने सुरू केलेल्या प्रधानमंत्री किसान सन्मान निधी योजनेसाठी शेतकऱ्यांना बँक खात्यास आधार क्रमांक लिंक करणे आवश्यक आहे. यासाठी ३० नोव्हेंबर ही अंतिम मुदत देण्यात आली आहे. यापुढे यासाठी मुदतवाढ देण्यात येणार नाही, अशी माहिती जिल्हा समन्वय अधिकारी तथा निवासी उपजिल्हाधिकारी प्रशांत पाटील यांनी दिली.
या योजनेअंतर्गत एक ऑगस्ट २०१९ पासून पात्र लाभार्थ्यांपैकी डाटा आधार लिंक असलेल्या लाभार्थ्यांनाच या योजनेचा लाभ देण्यात येणार होता. मात्र, मोठ्या प्रमाणात डाटा आधार लिंकिंग प्रलंबित असल्याने बरेच लाभार्थी या योजनेच्या लाभापासून वंचित राहण्याची शक्यता होती. त्यामुळे केंद्र सरकारने लाभार्थ्यांचा डाटा आधार लिंक करण्यासाठी ३० नोव्हेंबरपर्यंत मुदत दिलेली आहे. ही शेवटचीच मुदतवाढ असून, त्यानंतर कोणतीही मुदतवाढ देण्यात येणार नसल्याचे सांगण्यात आले.
यापुढे म्हणजे एक डिसेंबर २०१९ पासून लाभार्थ्यांना वितरीत करण्यात येणारे सर्व हप्ते आधार लिंक असलेल्यांनाच देण्यात येणार आहेत. त्याकरिता पी. एम. किसान पोर्टलवर दुरूस्ती करण्याची सोय उपलब्ध करून देण्यात आली आहे. त्यावर शेतकऱ्यांनी दुरूस्ती करून घ्यावी, असे आवाहन करण्यात आले आहे.
.................